【Now Sports】香港人這些年既嘗過《IT狗》掙扎前行的那一碗頹麵，也消受過《白日之下》那份無力感，何不走進導演簡君晉（阿簡）的足球世界？矢言永遠支持意大利的他，一直想開拍足球電影，並深覺電影人可從足球中學習。
撰文：球十三
「最難忘當然係2000年嘅時候，意大利喺4強對荷蘭好早已經打少個，10人應戰，但真係奮戰到底，去到尾竟然係代替保方嘅托度救幾球12碼，互射12碼贏埋主辦國荷蘭入決賽。」簡君晉細說EURO的難忘回憶，一說就是接近四份一世紀以前的事：「當時好細個睇，嘩，原來足球真係有奇蹟。去到決賽，到補時輸畀法國，結果攞到亞軍。」
意大利贏過2006年世界盃，阿簡與其他意粉一樣，苦等十數載才見證愛隊再贏大賽：「另外當然好難忘係上一屆，意大利贏冠軍。當隊波被睇低一線，各樣戰術都發揮得好，第一次睇到佢哋捧歐洲國家盃。」
被問到可有從足球得到拍電影的靈感時，他謂：「我一直都想拍關於足球嘅電影，正正由領隊、教練嘅風格會睇到，好似其中我最鍾意嘅安察洛堤，佢好似冇咩特別，但可以發揮到任何球員。」在阿簡眼中，導演與教練角色相若：「無論係明星或者係一啲冇咁出名嘅球員，喺佢手上都發揮得好好；而佢面對所有危機都表現得好鎮定，呢樣嘢，我諗做導演嘅都喺佢身上學到嘢。」
既是意粉死忠，不消說今屆繼續追捧：「冇第二隊，咁多年嚟都係，好深受意大利無論足球或者各樣文化、電影、藝術影響，所以我永遠支持意大利。」不過他承認強敵環伺：「因為意大利上屆捧咗盃，其實好難冧莊，但當然都睇好；法國同德國都係好強嘅球隊。英格蘭，雖然我自己唔鍾意，但都係實力好強。」
談到今屆最想與誰一起睇波時，阿簡謂：「通常都係同friend睇，連續幾屆都同導演朋友睇，各有支持、各有所好，另外同屋企人睇波都好開心。」
【EURO睇波團】，決賽周開打前邀請名人或本地體壇名將分享對EURO的睇波經歷，以及對今屆的睇法。
下一位團友預告：謝覺偉
相關文章：
【EURO睇波團】盧覓雪：睇俊男睇比寧咸
https://sports.now.com/home/euro2024/news/details?id=38913345800
【EURO睇波團】施寶盛繼續撐狂牛
https://sports.now.com/home/euro2024/news/details?id=38912972727
【EURO睇波團】伍家朗：撐C朗最後舞曲
https://sports.now.com/home/euro2024/news/details?id=38912830483
【EURO睇波團】陳肇鈞：恩尼斯達感染我
https://sports.now.com/home/euro2024/news/details?id=38912609673