【Now Sports】多蒙特球迷獨特之處，在於佢哋熱衷、但好溫柔；佢哋會激動、卻唔會漫罵，失望，總會留低支持到最後。多蒙特長年係全歐洲主場入座率最高嘅球隊，一班高大身材、托住啤酒肚嘅金髮大叔，支持總係攞亞軍嘅球隊，睇落胸無大志，但總係全歐洲最身體力行嘅球迷。
撰文：Jules & Joshua
遠隔重洋，上周末我毅然由香港飛抵倫敦，只為加入佢哋嘅一份子，一睹多蒙特征戰歐聯決賽球場上嘅風采。十幾年追隨，我見證咗佢哋飽歷榮辱、跌宕起伏嘅歷程。人生若比作球場，充滿順逆起落，只要始終保持熱忱，相信終會笑傲球場。
當多蒙特晉級決賽後，我即係心郁郁想買飛，同未婚妻商量後佢贊成，因為工作較忙唔想請假，所以買咗張星期五晚飛去倫敦嘅機票，星期一就返香港，盡量以唔使請假為前題。
我哋第一個遇到嘅困難，就係買錯飛！
張飛係喺網上平台買返嚟，我之前入場睇兩場多蒙特比賽都喺嗰度買，點知今次係第一次睇中立場，我留意到其他網站有列明多蒙特球迷區同埋皇馬球迷區，但我用嗰個網somehow冇show到出嚟，我盲舂舂買咗，覺得中立場唔緊要。點知收到張飛嘅時候，發覺係皇家馬德里球迷區，即使我收到個官方email都係西班牙文。當時我都未識驚，仲覺得中立場應該打到亂晒，唔會分為8成主場、兩成作客㗎啦……
但去到時發覺弊啦，行上去溫布萊條大樓梯，離遠已見到一班人湧上去，左邊黃色右邊白色，心諗大鑊啦，係咪真係要「白中一點黃」？所以我哋喺嘟QR Code前嘅閘口，睇吓有冇皇馬球迷買錯飛可以交換。側邊有個保安走埋嚟話：「你唔會成功㗎啦，因為歐聯個APP喺準備開波前冇得再transfer。」佢建議我入場內再搵，睇下好唔好運，仲話：「如果你冇運，就一定冇好日子過。」
我同未婚妻硬住頭皮，除晒身上所有多蒙特嘅黃色物品，收埋喺裝望遠鏡個袋度，希望喺多蒙特區搵到穿白衫嘅人換飛。我哋直頭入埋皇馬嗰邊嘅security check閘口，個保安要求我拎晒所有物品，個袋入面嘅黃色物品一嘢抽晒出嚟，當時勁驚！其實諗返都冇乜嘢，只不過有啲壓力喺度。之後我哋去到皇馬球迷區位置，發覺座位附近一個黃衫嘅人都冇，全部著白色衫。
我坐低後同未婚妻講，因為我哋早咗兩個鐘入場，目標要喺一個鐘頭內搵到兩個都係買錯飛嘅皇馬球迷，如果冇都冇辦法，唯有唔著黃色就坐喺皇馬球迷區隱形90分鐘。我哋好決斷去到多蒙特最黃嗰區嘅角位，大概都搵同我哋座位高度差唔多，因為如果佢哋個位太靚而我哋個位太差，唔會肯換。非常非常之幸運，一行到去抬高頭見到兩個白色人坐咗喺度，其實當時8至9成多蒙特球迷都埋晒位，零舍有兩個將手擺喺膝頭哥，好驚好收歛，一句聲都唔敢出。當我行埋去，佢哋都好似以為我搞對抗，我問佢哋：「想唔想坐返去皇馬嗰邊？」跟住佢哋答：「好呀！」我帶佢哋去我哋個位，等佢哋望下，因為兩個區都相隔幾百米，行咗5至10分鐘，又多人，逼返去後好開心，大家都終於可以坐返喺自己球迷區。我哋一個handshake，一個擁抱，我同佢哋講：「Good luck！無論戰果如何，this is football，足球精要就係當大家有需要，係唔會吝嗇幫大家。」
我諗好多人都知，德國多蒙特球迷出名熱情，好落力同好有氣勢，yellow wall嘛！佢哋比其他球會嘅吶喊助威都勁，入得場都熟晒架步，除咗我呢啲亞洲人，包括我見過有日本人因為言語問題，所以至跟住佢哋節奏，嗌下就算。小弟有幸之前睇過兩場多蒙特主場同埋今場決賽，我感覺球迷今場嘅吶喊，比之前兩場更加落力。我之前睇嗰兩場都係主場對拜仁，熟悉多蒙特嘅都知south side嘅stand係特別勁，好震撼，全世界企晒喺度冇人坐，然後嗌足全場。之前兩次主場，其他3個方向嘅球迷都唔係好多互動，今次係決賽，可能最active嘅球迷至嚟睇，全場多蒙特球迷企足90分鐘、嗌足90分鐘，除咗失兩球波嗰兩個moment靜落嚟10秒左右，係冇停過。
我發覺多蒙特球迷有一個stereotypical（典型）形象，就係大部份鍾意飲啤酒、身型龐大嘅中年阿叔，佢哋粗獷，睇波時好激動，係咁鬧係咁嗌，但對自己人又極之nice。我嗰日隔籬係個成1.9米高嘅德國大肥佬，當球隊一犯規或者射失波、失控球都會好衝動，fing晒手然後講晒粗口，但係講完後又發現自己可能激動得滯，怕有冇fing親或嚇親人，不斷同四圍嘅人講sorry，sorry……個反差係好有趣。
相反，皇馬嘅球迷好多係後生啲，外貌比較似屁孩，四圍Yo人同挑釁人，另外比我想像中多中東人，我亦見到兩個香港人。By the way，可惜我當日冇見到其他嚟自香港嘅多蒙特球迷。總之皇馬球迷個個image都比較突出。
講返場比賽，上半場我一路唔太睇好多蒙特，我心態當然想贏，有一個夢，但其實冇乜信心。坦白講，上半場係好有驚喜、好有驚喜，全部球員都好勤力，贏晒五五波。因為出咗富卻古，佢個制空力係hold住晒成條中場線，然後截晒皇馬啲波打快攻，有好多次黃金機會。但係當miss咗後，我已經feel到「瀨嘢」。因為皇馬2018年對利物浦，同埋對馬德里體育會絕殺亦係好有韌力。當把握唔到機會，其實我當刻好驚，半場時已經感覺到係咪會輸，但當然我都安慰自己，只要keep到上半場狀態，係贏到，絕對贏到。因為上半場完全壓住皇馬嚟打，到最後差嘅事情發生咗，萊斯一入嚟即刻失兩球，唉，當刻即刻靜晒。
去到80幾分鐘落後0:2嘅時候，已經接受多蒙特冇嗰種韌力去追返嘅事實。吹完場雞我仲笑笑口，見到我未婚妻目光無神咁，我仲去安慰佢攬住佢話：「唔緊要嘅，唔緊要嘅。」完場後，其實大部份多蒙特球迷都留喺度，極少人會走，因為都知道多蒙特球員會走埋嚟觀眾席道謝，大家會坐好耐。我其實都想留到最後，睇下可唔可以同球員影幾張相。我望望下，情緒已經開始唔係好支撐到，我亦唔想見到頒獎禮，所以決定早走。我哋坐好高，行樓梯落去到出入口，睇得清楚少少，我就近少少望住班球員，細細聲講句拜拜，之後就擰轉面，咁就同萊斯最後道別。
萊斯喺多蒙特球迷心目中地位確好高，見佢當日場波唔係正選，但熱身出嚟嘅時候都有好多球迷迎接佢同歡呼，基本上全部人企晒起身。山曹表現相對上好似冇咁好，但其實見到佢一直都好冷靜，打幾次反擊都踢得好好，我覺得都收貨。
當一路行出球場，好多皇馬球迷原來都冇入場，就咁企喺場外打氣，好多喺度奚落我哋多蒙特球迷，又挑釁，成班多蒙特球迷都冇話反抗或者鬧返對方，就咁垂頭喪氣離開。其實當時心情係覺得體驗好好，已經好開心，冇乜嘢，但沉澱落嚟搭飛機途中以至依家返到香港，都有一種空虛感覺，好失落，仲未接受到事實，仲係有嗰種幻想，喺腦海入面睇到多蒙特捧盃情景，仲未接受到。但係，life must go on！
想對其他多蒙特球迷講少少說話，其實多蒙特球迷係好特殊嘅存在，我假設有資歷到依家仲支持多蒙特嘅，一定都經歷過好多好多唔同嘅挫敗。小弟其實係2012年多蒙特喺歐聯對馬拉加嗰場絕殺比賽後開始鍾意隊波。嗰場就係出現咗好出名嘅「海盜望遠鏡」（大型橫幅），有個黃色人望住你個樣，好恐怖。
之後決賽輸俾拜仁，我一直有留意睇多蒙特，大概2014/15年就真係好鍾意睇，同埋嗰陣喺英國讀書，喺歐洲好容易飛過去睇。我想融入啲球迷，所以讀大學Year 1嘅時候學咗一年德文，想學下佢哋點唱歌同點嗌口號。之前兩場睇主場都係對拜仁，一次輸係俾利雲度夫斯基倒戈入，一次係0:0冇波入。所以我現場睇多蒙特3次，都冇睇過佢哋入1球波。2016年歐霸盃睇直播對利物浦，多蒙特領先3:1輸返3:4；跟住睇萊斯踢德國隊，世界盃受傷，到冇受傷又踢得差出局。
然後到舊年（德甲），有啲希望啦，臨尾自爆……我講嘅呢一啲經歷都係不斷鍛煉緊我嘅心志。做多蒙特球迷真係要好佛系，先可以繼續落去。多蒙特教識我嘅係享受經歷，講好似好佛系、好無大志，但真係多蒙特訓練我嘅心志，享受過程而唔好太在意戰果。以前係好care個結果，好忟憎，呢個係我支持多蒙特嘅成長。
亦相信香港嘅多蒙特球迷，大家都經歷咗好多好多先可以行到嚟呢一步。呢個累積返嚟嘅情感係好獨特、好特殊，嗰份親密關係比其他球隊多好多；對於嗰種共患難，然後一齊喺低谷中企返起身，見到有希望；見到希望又係失望，而經過修補後又有希望，不斷循環就好似人生。所以，鼓勵多蒙特球迷繼續一齊努力行呢條路。
撰文：Jules & Joshua
