【Now Sports】潘沛軒想寫下「NOTHING IS IMPOSSIBLE」時似乎執筆忘字，笑言自己太耐沒寫字，便向一旁的職員問道有否錯字，最後寫下此行亞洲盃想向球迷說的話。
擊敗世界強國伊朗對港隊來說是不可能的事，但潘沛去年亞運把不可能變成可能，他於8強面對伊朗的入球，一箭獵殺這頭亞洲雄獅，助港隊打入亞運4強創下歷史。執筆雖忘字，但他未忘對伊朗入球的感覺，直言當初沒想過可以在對方身上取得入球，但被問及有否信心再對伊朗入球，他表露出一絲絲的自信和謙卑。
「對伊朗入波嘅感覺已經入咗骨，好記得嗰一分鐘，好想再射入佢哋。」
不過他坦言：「信心就一定有，但入波唔能夠強求。你問我想唔想再入到佢哋波，我一定好想，但伊朗係好強嘅對手，所有嘢要一步步嚟，先做好安達臣嘅部署，做好防守，再做好啲前場逼搶，當所有嘢都做到嘅時候，入波就自自然然而嚟，只要謹記射門嘅感覺，就可以捕捉入球嘅瞬間。」
過去大港腳3次對壘該亞洲雄獅悉數敗北，強弱懸殊令港隊在場面上也相當吃力，他的謙卑或多或少是來自港隊對伊朗一敗如水的往績，每每都落敗收場，場上的將士難免冀望可以改變，潘沛亦是其中之一，他直白道出今次亞洲盃與伊朗交手希望做到的事。
「伊朗係好難，但難都要做，唔好一嚟就想改變結果，首先改變局勢，起碼要做到令場面唔好咁一面倒，唔好一打就好似輸硬咁，將戰況控制好，再慢慢揼靚嗰比數；好記得啱啱亞運都係咁，先穩住局面，結果下半場開波1分鐘就殺佢哋一個措手不及，先入一球之後打好穩守突擊，最尾就贏咗伊朗。」
談及再進一步的目標時，潘沛直言「一定係出線」，他亦深喑出線的條件：「要喺同級嘅巴勒斯坦身上攞到分數，所以我比較著重呢場波，贏到嘅話對我哋出線非常有利。」
暫將數字和成績擱於一旁，相信此行亞洲盃承載不少港將最純粹的願望，陳晉一曾言「亞洲盃就係我嘅世界盃」，對潘沛而言與偶像孫興慜在同一綠茵場上交手是他心底裡的盼望，每次入球後都模仿對方拍照的慶祝動作，一切都蘊藏著該名男孩對偶像的愛慕：「因為son，所以想對到韓國，不過除咗見到偶像之餘更加想感受下人哋嘅水平同我哋差幾遠，我知道嗰距離係好遠，但都想去feel吓。」
群雄逐鹿，潘沛在此行希望與孫興慜於場上交手是一個奢望；對球迷來說港隊這次亞洲盃可以出線是不敢奢望，但潘沛就如安徒生童話故事中的孩童般有著最單純的信念：「我哋要相信自己，波係圓嘅，場上面大家都係同一對腳，所有嘢都可能發生，正如我都無諗過可以踢到港隊，更無諗過由上年攞到第一頂喼帽到依加就話代表港隊踢亞洲盃，成件事就好似噚晚發夢朝早成真咁，因為無嘢係無可能。」
有時候人能夠成功，就是對不可能發生的事和物有著徹底的懷疑，然後嘗試挑戰，最後便因這份偏信而成功，正如潘沛所寫下的：
「NOTHING IS IMPOSSIBLE」
香港隊將於深夜1時半，在亞洲盃分組賽第2場硬撼伊朗。
【壹港亞洲盃】勞烈斯：小小漁港定能震驚世界
https://sports.now.com/home/news/details?id=38878122653
【叁港亞洲盃】「輝」盡全力探戈 但求落幕無悔
https://sports.now.com/home/news/details?id=38879651682
