【Now Sports】白禮頓打和曼城，正式確認前6名來季參戰歐霸盃，一支今季由頭到尾表現平穩，遇強愈勇嘅異軍，實在值得呢個連熱刺、車路士都得個「睇」字嘅資格。
撰文：球十三
先淨係講呢場波，有睇嘅一定同意曼城並唔係完全hea踢，而白禮頓硬撼擂台躉保持今季遇強愈強特質，加埋主場謝幕嘅動力踢咗一場好波，單係睇安斯素今場入嗰球世界波，仲有艾斯度邊恩之後又勁射貼柱出畀幾乎收死艾達臣就百看不厭！佢哋面對曼城全場20次射門，過去兩年半，冇其他任何英超球隊做得到。
曼城嘅連勝走動，亦係由白禮頓煞停。
拉闊成季嚟講，白禮頓打從開咧戰作客砌低曼聯，令人家新帥坦夏碰到一臉子灰，為今季打殘Big 6揭開序幕；代表作包括最終雙殺曼聯、車路士，仲炒利物浦同阿仙奴3蛋，以一支嚴格嚟講連中型班都談唔上嘅球隊，勁到癲！
講到勁，亞洲人當然特別留意三笘薰，日本人出晒位不在話下，但能夠躋身前6點會得一個勁？麥卡里士打、摩西斯卡斯度甚至老將韋碧克......好多個都搶眼。BBC有個數據好值得注意，係今季英超至今有20個由小將入波，有11球嚟自白禮頓（19歲嘅安斯素、18歲嘅艾費格遜同埋保拿洛迪），證明隊波重用新人，新人亦不負所託。
講到奇兵，賓福特下半季有段時間立油，阿士東維拉就發力較遲，冇辦法唔俾季初到季尾水準都穩嘅白禮頓騎住。
家陣進軍歐洲，領隊迪些比講到明應付4條戰線要買球員，係嘅，太多往績話畀大家聽類似異軍緊接一季進軍歐洲，往往兼顧唔嚟，只希望白禮頓係異數，繼續打殘強隊、繼續重用小將、繼續踢好波。
多幾隊好似今季嘅白禮頓，英超至更好睇！
白禮頓今季鬥Big 6代表作
主和曼城1:1
客勝阿仙奴3:0
主勝曼聯1:0
客勝車路士2:1
主勝利物浦3:0
主勝車路士4:1
客和利物浦3:3
客勝曼聯2:1
撰文：球十三
足球迷叫第十二人，冇偏愛，冷眼旁觀係十三。