【Now Sports】相信賓斯馬於歐聯皇家馬德里作客車路士再表演帽子戲法後，大家都會認同賓斯馬係一個好全能嘅射手。就算之前佢講笑形容自己係法國跑車亦一啲都唔誇張，畢竟佢係首個喺一季內拎到11個歐聯入球嘅法國球員！
撰文：June
當大家發現賓斯馬（Karim Benzema）嘅優點，就開始話賓斯馬多年來成全皇馬嘅基斯坦奴朗拿度（包括我都有咁覺得），係被C朗耽誤嘅射手。賓斯馬反而好謙虛話其實係C朗幫咗佢好多，因為C朗係畀咗最多助攻佢嘅人。有段時間賓斯馬被人噓，C朗仲讓咗個12碼畀賓斯馬射，希望佢有返信心。
或者係同C朗相輔相成嘅關係，當年賓斯馬經常助攻C朗令佢變得更有組織攻勢嘅能力，佢嘅無球走位亦為隊友帶出空位及創造機會。依家嘅賓斯馬閱球能力好高，門前把握力又或者係噚晚兩個頭槌，睇落賓斯馬好似就咁一頂就入咗，但咁嘅入球無論角度同時間都要好配合。
賓斯馬嘅迫搶能力，亦係一絕，除咗2018年歐聯決賽迫搶卡列斯令人印象深刻外，佢今季迫到兩個2021年歐洲同歐聯最佳龍門（當拿隆馬同伊度亞文迪）都要喺自己腳下失波。有球迷話係龍門犯錯，但兩名世界級門將同樣失手，應該要讚賓斯馬勤力迫搶係成功嘅。
不過賓斯馬表示佢唔係為成為世界第一而踢波，佢享受尋日咁高水平嘅比賽。佢亦唔只一次講過，佢踢波係畀鍾意足球嘅球迷睇。
回顧C朗都離開咗皇馬差唔多4年，而兩年前賓斯馬開始擺脫「賓斯貓」呢個摩連奴畀佢嘅稱號，變成幫皇馬擔大旗嘅獅子，但當年佢都未完全成為一個全能嘅射手，仲依然會門前失機。但今日佢已經喺36場比賽入咗37球，提供咗13個助攻，全能9號嘅踢法，希望足以贏到更多鍾意足球嘅球迷喜愛佢。
最後，今場安帥堅持出中場三寶：摩迪、卻奧斯同卡斯米路，加上華維迪踢右翼位置，係收到好效果。摩迪噚日控制到中場，無可挑剔，而華維迪絕對係好啱踢右翼，因為佢嘅跑動減少咗三寶要覆蓋嘅範圍，亦幫輕咗未回覆最佳狀態嘅卡華查。下場第二回合皇馬主場對車路士，絕對唔可以因為有兩球喺手而輕敵，更唔好諗住死守。期待另一場精彩比賽！
相關文章：
【鏟草男女】賓斯馬由貓變獅子！
https://sports.now.com/home/news/details?id=29974314945
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen
