球王變影帝？
(©AFP)
【Now Sports】好多好多年前，已經聽人話美斯似張學友，亦似張家輝。呢陣子更聽見人話，美斯連演技都似埋張家輝，球王變影帝。
美斯（Lionel Messi）落實入「門」，前一日仲喺告別巴塞隆拿嘅記者會上七情上面、聲淚俱下，一日後身在巴黎笑容滿面，悲喜反差令網民覺得之前嘅係演技。人人都有唔同意見，話佢感情唔係真，而係影帝張家輝上身，為嘅係唔想俾人話只向錢看，或者日後有機會倒戈（PSG同巴塞喺歐聯係幾有緣㗎），都會得到善待，係自我保護行為。
唔好咁啦，第二個唔敢講，十三覺得以美斯嘅江湖地位，使鬼做戲。
美斯近期已經唔止一次展現真性情，講嘅係上個月美洲國家盃稱霸，終止國際賽錦標荒後，又唱又跳，然後玩碎步轉身捧盃。真情流露，幾時見過佢咁暢快？
對巴塞前前後後嘅廿載情，真的假不了，俾你讀一條龍學校十年八載，都唔會話對母校冇感情，何況，呢間球會為美斯贏得一切，佢喺記者會嘅眼淚，假唔到。如果真係好戲到咁，隨時勁過張家輝。
再講，大家只係想睇好波，戲真定情真，重要咩？
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen
