簡尼被換因受傷，抑或戰術理由？
(©AFP)
【Now Sports】英格蘭喺歐洲國家盃首場分組賽，主場1:0小勝克羅地亞，過程偏平淡，你可以話如果唔係史端寧把握一次機會，隨時和波收場，但三獅今仗主場都唔係明顯擺主攻陣，同格仔軍鬥踢中場防控足球居多。有時踢波就係咁，踢得好唔代表會贏波，踢得唔順又唔係一定冇收穫。
三獅今仗係踢得保守嘅，睇到兩閘上去前場次數少之又少就知，同埋擺迪勤懷斯搭加雲菲臘斯，就係加強同克羅地亞控制中場，雖然唔算搶到好多coverage，但起碼菲臘斯製造一次助攻就贏波，現代足球有時就係要呢啲，機會唔使多，一次搞掂你就得。
當然，今仗戰術係任由前面哈利簡尼（Harry Kane）、史端寧、霍頓個人質素爭取入球係未達水準，就算霍頓開賽初段有球中柱波，同史端寧奠勝，發揮都係一般。
問題在於哈利簡尼嘅定位，究竟領隊修夫基係要踢中場控制足球，再倚重曼城踢法般用兩位偏側鋒入楔中路爭取士哥，還是要讓側鋒製造機會讓正中鋒做埋門一腳，呢點筆者未睇得透；希望今日提早換走簡尼，同佢比賽中撞到門柱傷倒地有關，如果係戰術上咁做，睇嚟買咗佢神射手嘅波友，想等派彩就難啲啦。
撰文：員A
做體育傳媒時咩位置都做過，做網店店長都係一腳踢