【我們都是這樣睇EURO】福音漫畫家繼續「葡」

【Now Sports】聖經的人物與典故，在他筆下刻劃得細緻入微；足球的人與事，他一樣朗朗上口。這位福音漫畫家最愛葡萄牙，今屆歐國盃力撐愛隊衛冕。

「初次睇歐國盃大約係2000年，但那時工作很忙，無甚印象。直到2004年嗰屆就印象深刻，因好多球星湧現，開始鐘意葡萄牙。費高、基斯坦奴朗拿度、迪高、雷哥斯達、卡華路等等，好多當時已效力大球會，或之後加盟巴塞隆拿、AC米蘭、曼聯及皇家馬德里等。嗰陣葡萄牙陣容真係好強大。」張文偉（小偉）道出對葡萄牙的熱愛。

他續談及對賽事的難忘回憶：「當然係（2004年）決賽輸俾希臘啦！直頭瞓唔著，不斷問點解。啱啱俾希臘入球時，仲好樂觀㗎，以為大把時間可以反勝。點知……。其次係C朗同費高同隊，好夢幻。當時C朗喺曼聯已經係球星，費高喺皇馬更係6條煙之一。但我本人其實最鐘意迪高，甚至網名都曾經以佢命名，之後佢喺巴塞有幾勁就係人都知。」

「回想返以前啲足球好似寧舍好睇，特別多勁人。打《Winning》足球game都投入啲。唔使講，一定係捧葡萄牙，分分鐘係C朗最後一屆，淨係呢點已經要支持到底。上屆佢喺決賽後備席幫隊友打氣場面，仲記憶猶新。」

葡萄牙去屆歷史性捧盃，小偉當然興奮不已，並喜獲朋友在葡萄牙購買紀念奪冠的紀念品相贈（見圖），不過作為死硬派「葡」友的他，承認愛隊客觀上衛冕機會低。「我推測比利時奪冠。盧卡古喺國際米蘭好fit，加上迪布尼、狀態得6成嘅夏沙特，應該ok嘅。」

一如其他球迷，小偉期望賽事可以有較多觀眾入場，有啲氣氛。「望住個空球場好冇癮。當然，保護觀眾健康係需要嘅，希望可以搵到平衡。另外，希望多啲球星健康可以落場，多啲入波。」

本身工作較自由的他，已習慣深夜工作。「捱眼瞓良方，唔好食咁飽……哈哈。」一般球迷愛與親友或支持同一隊的波迷睇波，小偉卻屬另類：「最想同啲敵對球迷一齊睇。咁樣場內、場外肯定都好有火花。尤其係當葡萄牙贏嘅時候。哈哈！」

「但補充一句，我出名係燈。」

【下次預告：陳肇鈞最愛獨自睇波。】

【我們都是這樣睇EURO】「C朗女」最想同193姜濤睇波

https://sports.now.com/home/news/details?id=33575355150

【我們都是這樣睇EURO】Miss Wong憑意志起身睇波

https://sports.now.com/revamp/euro2020/web/news_detail.jsp?id=33562552012

【我們都是這樣睇EURO】花式足球施寶盛：模仿狂牛球星

https://sports.now.com/revamp/euro2020/web/news_detail.jsp?id=33546746679