熱刺2：0屠「狼」

【Now Sports】熱刺憑哈利簡尼和靴爾保上、下半場各入一球下，主場2:0擊敗狼隊全取3分。

周日熱刺主場對狼隊的英超賽事，力求爭勝的熱刺可謂「擺大個頭」，哈利簡尼、孫興民、加利夫巴爾及阿里齊出任正選，狼隊方面則有法比奧施華任單箭頭，域陀費利拿、丹當卡作後上支援。

熱刺4分鐘就出現入球機會，簡尼25碼遠程炮射中柱，其後雙方埋門機會梅花間竹，7分鐘阿達馬查奧爾單人匹馬帶波至禁區，再傳予右路的施華起腳，省中熱刺後衛，再輕易被羅利斯接實。中段20分鐘巴爾主射自由球被撲出；那邊廂28分鐘施華在之前右路相若位置起腳，今次貼柱邊出界。尾段孫興民左路抽射被救後，戰至45分鐘入球終出現，簡尼接應靴爾保長傳，突破越位下輕鬆破網，為熱刺取得1:0優勢返回更衣室。

下半場熱刺力爭第二個入球，53分鐘一輪美妙傳送下由後上域基朗起腳埋門，柏捷斯奧僅僅撲出眉頂；2分鐘後簡尼禁區起腳被柏捷斯奧救到再中柱，後上的阿里補射又射中柱，錯失大好入波機會。其後巴爾右路拉弓再被柏捷斯奧救出，但今次有靴爾保執雞成功，61分鐘熱刺領先至2:0。落後下狼隊繼續努力組織攻勢，但施華、查奧爾及祖奧莫天奴的埋門都未能轉化為入球，最終熱刺主場2:0擊敗狼隊，全取3分。