曼治狀態大勇。
(©AFP)
【Now Sports】車路士於周三歐聯8強首回合作客以2:0擊敗波圖，晉級在望。
車路士跟上場英超相比作出5個調動，以添姆雲拿掛帥，配合曼治（Mason Mount）、哈伐斯攻堅，防中干堤、中堅泰亞高施華先列後備。波圖由穆沙馬希加、路爾斯迪亞斯組成雙箭頭。
上半場，車仔取得大部份控球權，但攻門次數寥寥無幾，但命中率高。31分鐘，曼治擺脫對手後，接應中場佐真奴的傳送，第一時間轟入，以22歲87天成為車路士史上最年輕的歐聯淘汰賽建功者，而且連同英格蘭代表隊，近4場攻入3球。完半場前，中堅比比接應角球施頭槌，門將伊度亞文迪飛身救出。
易邊後戰至65分鐘，車路士換入佩利錫、基奧特，重整鋒線，但火力仍然平平。84分鐘，佩利錫射中柱，1分鐘後，左閘捷維爾偷走對手腳下球，再以速度突破，單刀扭過門將射成2:0完場。