一眾港隊成員穿上新球衣挑戰Teqball。
(@Now Sports)
【Now Sports】香港隊推出全新主場、作客及守門員球衣，即日起公開發售，為隆重其事，香港足球總會早前邀請香港足球代表隊球員黃洋、徐宏傑，香港女子足球代表隊球員鍾貝琪，以及教練張健峰穿上最新港隊球衣，於賽馬會香港足球總會足球訓練中心試玩新興運動Teqball。
談及充滿香港特色的港隊全新球衣，球員都表示喜歡，穿上主場紅色戰衣的隊長黃洋說，「首先著上身好舒服同埋好透氣，同埋個圖案好sharp、好精神。第2，個意義就係每次著起香港隊波衫，其實都提醒自己都要keep住一個好好嘅水準，隨時準備爭取入選香港隊嘅機會。」
女足成員鍾貝琪十分欣賞球衣上的圖案設計，「今年套香港隊波衫顏色上比較鮮艷，比起往年同前年都比較鮮艷，你會見到著上身個人精神啲，大家著同一件衫係好有活力。同埋鍾意佢今年個Pattern，你會見到有啲圖案，如果你睇真啲，其實好似一啲高樓大廈，所以就好代表香港，因為香港正正有好多高樓大廈喺度。」
穿上白色作客球衣的徐宏傑表示新球衣很舒服，「自己幾鍾意，因為我鍾意比較簡單，可能呢件波衫嘅設計都比較簡單，同埋著落都比較舒服，好輕身、好貼身。」
幾名球員除了試穿新球衣，亦試玩新興運動Teqball，似乎球員都被考起，鍾貝琪說，「因為第一次玩，比想像中困難。一嚟佢張枱係弧形，所以個波彈過嚟時會突然改變方向，呢樣係會有少少反應唔切，同埋Teqball呢個運動都講求技術，如果本身腳下功夫唔係幾好都會有少少擔心，但相信踢得多一定會令技術有所提升。」
黃洋大哥認為這個新設施對球員有幫助，「Teqball最大幫助係一個放鬆嘅練習，因為球員每次都會遇到國際賽或者本地聯賽嘅比賽壓力，其實需要搵到一個足球方式，去令自己精神層面放鬆，令到自己有更加好嘅精神狀態應付好緊要嘅比賽。」
