【Now Sport】香港人過去經歷無數風浪，速度滾軸溜冰甜姐兒王蘊妮認為，艱難日子總是低處未算低，既然大家撐得過沙士疫潮，今次嚴峻疫情準可捱過去。
「平時我都係去滑冰同做Gym，疫症期間都仲有朝早去滑冰，因為大部份時間都係我自己一個，所以都ok。但因為我之前去印尼訓練一個禮拜，返嚟香港冇得去Gym，盡量都唔想接觸到人，同埋隔離14日，所以同平時有少少唔同。
訓練最大分別係momentum差咗，因為好多比賽取消或者重新編排，同埋選拔又延期，想練得好啲嘅動力低咗，但都要同自己講：你都要準備嘅！去嘅地方盡量少接觸人，比較麻煩，有時去足球場跑步都太多人。突然間，多咗好多人出嚟。
當年「沙士」時我係小學，我依家唔係學生，好戥依家啲學生慘，因為太多唔明朗；今年比賽立立亂，雖然我哋唔係奧運項目，但為咗得到更好成績都好畀心機練習，依家要好努力推動自己。嚟緊目標係今年世錦賽，本來仲有亞洲賽，但依家唔知仲有冇；如果成績好，希望可以帶成績去亞運。
想同香港人講，2003年沙士都能夠度過，低處未算低，點都有出彩虹嘅一日。」
王蘊妮
（速度滾軸溜冰）
【編按：sports.now.com一連數天請來幾位本地體壇精英親述最新訓練狀況之餘，與港人互勉，一同集氣共度時艱。】
明日人物預告：
陳肇鈞（足球）
相關文章：
【港將抗疫集氣】周健宏：荒謬疫症一齊捱！
https://sports.now.com/home/other/details?id=28939445707
【港將抗疫集氣】呂麗瑤：為飲杯靚咖啡感恩
https://sports.now.com/home/other/details?id=28925719814
