【Now Sports-體育】有時去外國睇波,見到成街都係球迷,佢哋著晒波衫,頸巾、cap帽,咩都齊。而且一眼就可以認到佢哋係邊隊嘅Fans。好似粉藍色嘅曼城,紅色係紅魔曼聯,黑白班馬會係祖記/紐卡素,白色係皇馬等等。
撰文:步大力熊
到底有咩驅使啲人花錢出國,買貴波衫,做人肉廣告板幫球隊贊助商賣廣告?朋友食飯講波講到情緒激動問侯人屋企?沙治奧拉莫斯到底係打交定踢波?
以上可以從心理學去睇,特別係自我價值方面。
最簡單係贏波同輸波嘅反應。心理學家羅伯特·席爾迪尼喺70年代做過一個研究,指出球迷喺贏波嗰時,通常係用第一身去形容贏波,例如:「我哋今日打得好好,發揮到水準。」輸嘅時候就用第三身,例如:「班大帝都唔知做緊咩,佢哋啲走位超級亂囉......抵輸」。佢嘅研究亦發現,贏波日會有多啲球迷著球隊波衫出街。見到有人著同一球隊嘅波衫都會望多兩眼。咁都正常嘅,但嚟到2020年可能會俾人形容為勝利球迷......所以依家就算輸波都會有球迷選擇著波衫出街嘅,不過唔多......
其實自我價值係人類好重視嘅概念,而佢係來自與人嘅聯繫。當自己鍾意嘅事物被他人認同,絕對會令自我感覺良好,想不停做更多有關事物去加強呢個感覺。好似我哋講嘅「圍爐」咁樣,除咗講波,球迷都好鍾意分享自己珍藏波衫嘅相,IG同facebook都可以見到各路球迷同人分享喜悅。見到好多人讚又會提升自我感覺,驅使佢哋收集更多波衫同出post分享,而其他人見到又會想分享,形成咗一個有歸屬感嘅群體。
呢啲群體可以係成千上萬嘅球迷,鍾意同一隊球隊,雖然平時唔見面,但網上面嘅聯繫可能比同屋企人講嘢更多,球隊比賽時間一定會有人同你傾偈。耐咗就變成習慣,歸屬感係一樣奇妙嘅事,有時真係令人分唔到係愛定責任......所以why not both?
撰文:步大力熊
要做一個理性球迷?不了,成為球迷本身就是一件不理性而且瘋狂的事。
本欄逢周二及周四上載
周二 歪花
周四 步大力熊/泰萊
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen