【now.com體育】周四英超獨腳戲,修咸頓主場迎戰韋斯咸以1:2落敗,新帥哈辛赫圖未能取得3連勝。
修咸頓前線續由丹尼艾格斯、列特文、史超活岩士唐掛帥,韋斯咸就因為十字軍太多,後備席上只有6人包括2名青年軍,由盧卡斯佩雷斯與辛迪加斯合作攻堅,安祖卡路爾就先列後備。
開賽2分鐘,主隊已有個中龍射門,列特文起腳但被法比安斯基輕易沒收;1分鐘後,艾格斯左路扭入小禁區快腳一篤,但角度太窄未能中鵠。
22分鐘,鎚仔幫的佩雷斯有個黃金機會,在12碼點附近無人看管下起腳卻有點撻Q,連龍門也不中。雖然賽事節奏明快,但兩軍未能製造太有威脅的攻門,完半場前辛迪加斯20碼外左腳勁射亦無功而還。半場兩隊互交白卷。
50分鐘,韋斯咸門前一陣混亂,一眾守將以為越位卻未聞哨子聲,面對空門的修咸頓球員連環施射,最終由列特文撞入,主隊先開紀錄。不過,3分鐘後巴西中場菲臘安達臣(Felipe Anderson)禁區外右腳勁射,以一球靚波為韋斯咸追成1:1。
55分鐘,卡路爾後備入替。59分鐘,客隊快速反擊,安達臣接應米查利安東尼奧的妙傳,不負所託轟入,個人梅開二度,韋斯咸反先2:1。85分鐘,安東尼奧連過幾關後起腳,但未能命中目標。89分鐘,安達臣左路又再施射,不中目標未能連中三元,但無阻韋斯咸以2:1作客勝出。