【now.com體育】開季兩戰兩勝的利物浦,周一作客擊敗水晶宮後不足24小時已經再操,但領隊與球員都四萬咁口,絕無疲態,名副其實快樂足球。
稍作休息之後,周二下午領隊高普(Jurgen Klopp)已帶領紅軍在米活訓練場操練,期間只見高普笑得見牙唔見眼,羅拔圖法明奴、拿比基達、沙迪奧文尼、韋拿杜姆等新兵舊將亦心情暢快,無不笑不攏嘴。
紅軍心情大靚自然有理由,開幕戰主場清風送爽,慨贈韋斯咸4蛋,到周一作客水晶宮,雖然對手表現頑強,最後亦以2球淨勝,目前在聯賽榜高踞第2,只以得失球差稍為落後衛冕的曼城。
一向笑面迎人的神射手穆罕默德沙拿,上場雖然未有士哥,但功不可沒。完半場前他博得12碼,由占士米拿操刀射入;下半場又博得後衛雲比沙卡犯規,直紅離場,令水晶宮少打一人;補時階段他在後場傳予文尼,造就對方長驅直進,單刀破門為球隊奠勝。