【now.com體育】仲記唔記得揭幕戰見證被睇死嘅俄羅斯爭氣大炒沙特阿拉伯、基斯坦奴朗拿度執羊咩鬚、德國竟然失威包尾出局、阿根廷大難不死出線冇後福到16強都要講拜拜、日本同比利時鬥攻出局、尼馬誇張「碌」地、英格蘭由點絕殺突尼西亞，然後炒巴拿馬，之後一路殺入4強…..？係呀，一切恍如昨日，為期1個月嘅世界盃，今日踢埋決賽就落幕。
撰文：球十三
法國同克羅地亞合演最後一幕高潮，又唔係太夜，諗唔到要錯過嘅理由。
十三覺得今屆賽事好特別，好似欠缺一支由開波就俾人冠軍相感覺嘅焦點球隊，例如上屆德國或者阿根廷、2010年嘅西班牙、2006年愈踢愈好嘅強盾意大利、2002年有3R壓陣令人睇得過癮嘅巴西。今屆，意大利同荷蘭唔爭氣決賽周都冇份唔在講，巴西、德國、阿根廷唔止決賽冇份，4強都冇影，其實都幾睇唔慣。不過正因為一份新鮮感令比賽吸引。
十三想用「20年之戰」去形容今日法國大戰克羅地亞，賽前好多人仲講緊1998年場準決賽，而迪甘斯係當年主帥積基特得意門生，師承冠軍教練風格，至於達歷亦從當年教練巴拉斯域身上學法。據講克國1998年班國腳總動員到莫斯科撐場，而你慌法國名宿到時唔蒲頭咩？擺明，係20年前一戰嘅延續。即管睇係法國以熱門姿態勝出，抑或以人口而言屬細國嘅克羅地亞復仇兼歷史性捧盃。
今屆大賽戰況令人難忘，但係最難忘始終係同知己良朋、親人、戀人一齊睇波吹水，好多好多年之後，大家講番都會記得一齊喺某某地方齊齊睇某某比賽、睇某某球星……，到時記憶模糊晒，連比數都可能講唔番唔重要，不在乎細節，只在乎一齊見證世界足球大賽嗰份情懷。
今晚之後要等4年，真心，11點畀你睇到場決賽可遇不可求，捉緊睇大賽機會同嗰份情懷咪走雞。
一齊陶醉世界盃！
最後，無論係長期睇、間中睇或者今日唔覺意click到入嚟望兩眼，十三都想講聲多謝捧場，實在太開心每個賽日喺呢度陪大家前瞻比賽，只求大家都當我係波友，希望呢份情懷延續，英超賽季有緣再見！
法國VS克羅地亞
Now618台15/07 22:00直播
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen