莫拉達後備上陣亦入一球。
(©AFP)
【now.com體育】車路士下半場憑基奧特和莫拉達各入一球下，以2:0擊敗修咸頓，繼去年後再一次躋身足總盃決賽。
周日英格蘭足總盃4強賽事，由車路士對修咸頓。車路士今戰箭頭上用上基奧特，配合夏薩特和韋利安進攻，艾華路莫拉達退任後備；門將則用上韋利卡巴尼路。修咸頓方面則以沙恩朗搭查理柯士甸出任雙箭頭。
車路士一開波即強攻，5分鐘夏薩特禁區頂一記轉身後即時左腳埋門，可惜僅僅高出。2分鐘後夏神傳球至右路無人看管的韋利安起腳勁抽，皮球中楣後高出。事實上車路士上半場佔盡上風，25分鐘夏神與法比加斯左路小組配合後再傳中，基奧特來遲一步未能接應，戰至39分鐘這名法國前鋒再有埋門機會，接應法比仔傳球後先想用後腳射門，但皮球踢高，其後「銀河唯一」再施展掛射，省中修咸頓守衛出界，最終雙方打成0:0平手返回更衣室。
下半場車仔一開波即取得入球，夏薩特傳球至禁區的基奧特，後者面對4名守衛和門將出迎，以個人腳下功夫擺脫守衛攔截再扭過門將射入，車仔領先1:0。修咸頓落後下仍有黃金入波機會，54分鐘沙恩朗接應查理柯士甸傳球，單對單面對門將下，皮球y竟然一推推得太大力出界，錯失扳平機會。
修咸頓其後換入杜辛泰迪治以及列特文加強攻力，相反車仔則換入巴卡約高，希望保持勝局，在「一攻一守」下，令修咸頓取回不少攻勢，72分鐘柯士甸將皮球送入網，但球證判罰他侵犯卡巴尼路在先而食詐糊。最終車路士在82分鐘再入一球，後備上陣的莫拉達接應艾斯派古達右路傳中銅頭一搖，頂成2:0，莫拉達其後再把握突擊機會埋門，被修咸頓守衛白界線前救出，未能梅開二度，最終車路士以2:0贏波，將在5月19日與曼聯再於溫布萊球場爭奪冠軍。