AC曾是帥哥兵團。
(©AFP)
【now.com體育】卡卡掛靴，並沒令人意外，令人懷念係AC米蘭有過型男帥哥雲集嘅黃金歲月。
撰文：球十三
2017年，相信係對AC米蘭球迷傷感嘅一年，雖然離隊已久，但派路同卡卡（Kaka）呢兩個全盛期都效力紅黑兵團嘅星將先後告別，紅黑躉肯定好唏噓。卡卡全盛時期，係AC米蘭「荷蘭3劍俠」後最強年代，有力贏意甲之餘，仲年年都係歐聯爭標份子。
當年AC米蘭有佢、恩沙基、舒夫真高，仲有老將馬甸尼、哥斯達古達，係絕無僅有嘅型男帥哥兵團。當年意甲外援質素仲好高，又點似家陣咁良莠不齊，岩岩巉巉？
呢個巴西白白淨世紀初已經喺巴西球壇嶄露頭角，到真正響朵係2002韓日世界盃，開始顛倒眾生。除咗一張俊臉，佢球技確係出眾，盤傳射都掂，依家喺明日黃花嘅意甲想搵同等質素外援，太難。
2007年卡卡攞金球獎，算為意大利球壇爭光，之後10年，就進入美斯同基斯坦奴朗拿度玩晒嘅年代。
懷念AC米蘭同意大利球壇有過一段風光。懷念球壇曾經有呢個踢得又睇得嘅帥哥！
卡卡入過唔少金球，包括當年喺歐聯對拉科魯尼亞入嘅靚波，係十三其中最鍾意嘅。從控定到順勢射波動作一氣呵成，嗰球波，你估咁易控得靚？
相關片段：
https://www.youtube.com/watch?v=QMB-tS2wxGU
撰文：球十三
足球迷叫第十二人，冇偏愛，冷眼旁觀係十三。
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen