【A&M Diary】身邊總有一位豬隊友，唔係因為佢成日出錯累街坊，而係佢對豬肉嘅喜愛！位於銅鑼灣嘅Mokumoku Yakiton，餐廳主打日式豬肉串燒，而且玩得刁鑽，唔少珍稀部位都可以一次過品嚐，你嘅豬隊友絕對滿意啦！
Mokumoku Yakiton：刺身盛合
Mokumoku Yakiton嘅刺身款式都係時令海鮮，今日嘅盛合就有三文魚、油甘魚、帶子同赤蝦。帶子同赤蝦新鮮彈牙，鮮甜飽滿，仲有膠質口感；但最驚喜嘅都係油香十分豐富嘅油甘魚，食完之後絕對齒頰留香！
Mokumoku Yakiton：燒鱈魚乾
鱈魚乾輕輕烘烤後變得香脆可口，淡淡嘅鹹香味令魚香味更為突出。
Mokumoku Yakiton：豬小腸、豬大腸、豬肝串串燒
Mokumoku Yakiton嘅串燒主打就係各種各類嘅豬肉部位，連極少見嘅豬小腸都有，見到即嗌！大廚將內臟清洗得非常乾淨，加上使用新鮮食材，所以夠乾淨又無異味！豬小腸非常彈牙，巧感煙靭；炭燒過嘅豬大腸將油份逼出，帶有焦香味。但最正嘅係店家秘製嘅醬汁，非常惹味。
Mokumoku Yakiton：豬脷、豬顎骨、九條蔥豚肉卷串燒
如果你覺得豬小腸都未夠特別，咁一定要試吓Mokumoku Yakiton嘅豬顎骨串燒！豬顎骨嘅肉鮮嫩多汁，非常Juicy，一試難忘；豬脷爽口彈牙，加上所有串燒都係即叫即燒，夠晒新鮮熱辣！另外，不得不提九條蔥豚肉，由一入口嘅豚肉油香，再慢慢湧出蔥嘅獨特香味，非常驚喜。
