【A&M Diary】去屯門三聖就梗係食海鮮啦！呢度嘅海鮮餐廳選擇多，而且海鮮都係自己買完再加工，所以每間酒家嘅分別其實唔大，如果想比較嘅話，當然要由小菜入手啦！海天花園酒家係三聖食海鮮嘅名牌之外，佢嘅叉燒更加係隱藏嘅強項，令我哋有海鮮以外嘅驚喜！
海天花園酒家：蜜汁叉燒
厚切嘅叉燒肥美肉厚，面層沾滿惹味嘅蜜汁，加上燒得香脆嘅焦邊，口感同味道同樣俱備，係海天花園酒家隱藏嘅強項！
海天花園酒家：花膠北菇鵝掌煲
海天花園酒家嘅花膠北菇鵝掌煲經長時間炆煮，全部都夠晒入味：北菇厚身但口感軟腍、鵝掌炆得勁入味，皮滑肉嫩、花膠夠膠口又黏嘴，索晒其他食材嘅味道，充滿骨膠原。
海天花園酒家：南乳脆香骨
海天花園酒家嘅脆香骨即叫即炸，炸到金黃色，外層酥脆而肉汁豐富又嫩滑，加上啖啖嘅南乳香味，層次感更為豐富。
