【A&M Diary】飲早茶除咗要好食，仲要抵食，特別係做街坊生意嘅地區酒樓！大埔作為香港一個重要嘅住宿區，飲茶食點心嘅選擇真係好多，但京都大酒樓嘅平日早茶時段都要排隊入座，全因為早茶勁多孖寶選擇，自選嘅配搭真係啱食仲要慳唔少。
京都大酒樓：鮮蝦炸雲吞
京都大酒樓嘅鮮蝦炸雲吞大大粒，炸到金黃色，賣相唔錯。食落口感酥脆，原隻嘅蝦肉大大隻，彈牙又有鬆脆口感，配埋酸甜嘅醬汁，更加惹味。
京都大酒樓：原隻鮮蝦腸
孖寶揀腸粉當然就係抵食又明智！腸粉滑溜，皮又唔會太厚，加上原隻新鮮大蝦，簡單卻又考功夫。
京都大酒樓：醬皇蒸鳳爪
飲茶食點心又點少得鳳爪呢！鳳爪嘅醬汁香濃又入味，而且份量又多，抵食夾大件。
京都大酒樓：山竹牛肉球
有媒介票選山竹牛肉球為最不受歡迎點心第二位，我真係完全唔認同呀！京都大酒樓嘅山竹牛肉大大粒，肉味香濃仲帶有淡淡芫荽香。
京都大酒樓：鮮蝦菜苗餃
京都大酒樓逢星期一至星期六嘅早茶時段都有指定$1/隻嘅優惠推介，而鮮蝦菜苗餃亦係其中之一選。菜苖嘅香味十足，加上彈牙嘅大蝦，口感非常豐富。
京都大酒樓：京都蝦餃皇
蝦餃當然係每一間酒樓嘅代表！京都大酒樓嘅蝦餃大大隻，蝦嘅份量唔少，皮薄餡靚。
