【A&M Diary】一頓完美嘅餐飲體驗，除咗食物本身，店員嘅服務，其實仲有環境氣氛呢！位於黃埔嘅O’Thai Restaurant，就將整個維港景送俾你，更特設户外位置，夠晒chill。至於餐廳以泰國菜聯乘意大利菜，選擇多而且出品高質之餘，營業時間更至凌晨1點，符合你嘅夜貓生活。
O’Thai Restaurant：三文魚牛油果他他、鮮蝦芒果米紙卷、柚子乾蝦沙律
Brunch set有5款冷盤選擇，口味務求令你清新開胃。綿密軟滑嘅牛油果配上油脂盈滿嘅三文魚，顏色鮮艷之外，口感層次亦非常豐富；微酸嘅芒果加上爽口彈牙嘅大蝦，用上米紙包裹住，泰國風味一湧而上；清新嘅柚子乾蝦沙律，酸酸甜甜，同樣極具暹羅風。
三文魚牛油果他他
鮮蝦芒果米紙卷
O’Thai Restaurant：新鮮法國生蠔
套餐額外加購嘅生蠔，由法國新鮮空運到港，除咗新鮮之外，蠔肉新鮮又Creamy，加上靚靚嘅海景，令海水味更濃郁。
新鮮法國生蠔
O’Thai Restaurant：三文魚芝士吐司、油蒜大蝦、雞肉沙嗲串
半溶芝士加上軟嫩三文魚，鹹香鮮香俱備，加上香脆嘅吐司，令口感更為豐富；用油煎香大蒜，輕易就帶出蝦嘅鮮甜味，而且蝦肉夠大粒又彈牙，口感同樣一流；串燒嘅靈魂當然就係沙嗲醬啦，香濃嘅花生味配上微辣嘅味道，夠晒惹味。
