【A&M Diary】講起西九，自然會諗起一個又一個嘅世界級博物館；又可以去西九嘅草地野餐同踩單車，愛動喜靜嘅你都會搵到唔少樂趣。至於為食嘅你，去到西九都唔會失望！原來喺西九臨海一帶有唔少餐廳，可以望住維港靚景慢慢嘆。鍾意食日本菜嘅我哋，就嚟到旭宵食堂，享受我哋嘅閑情逸致。
角切魚生丼
魚生嘅份量好多，舖滿三文魚、甜蝦、緋魚籽及多種白身魚等新鮮刺身，份量之多令每一啖都有飯都有滿滿嘅魚生伴隨，每樣魚生都鮮味十足，其中三文魚最肥美，幸福感大大提升。
招牌厚切牛舌心丼
旭宵食堂特意用上牛舌最鮮嫩嘅牛舌心精心炮製，外層燒得脆口並帶有焦香味，而且牛味香濃夠juicy。食到中段將蛋黃鑿穿後與飯粒、香蔥同牛舌撈勻，蛋黃嘅甜味令牛舌嘅味道變得更富層次感。
