【A&M Diary】行街見到靚衫會令你忍唔住停低，如果聞到好香嘅味道又足以令你留步嗎？喺充滿涼意嘅晚上，經過尖沙咀希爾頓大廈嘅鐵牛台灣牛肉麵，嗰陣濃郁嘅牛肉湯不經意刺激到我嘅食慾，激發起我嘅台灣味蕾，明明唔太肚餓，但忍唔住要入去嘆番碗，估唔到都有驚喜。
鹽酥小拼盤
花枝丸夠晒香口彈牙，鮮甜美味；鹽酥雞鹹味適中，外脆內軟，濃郁嘅雞肉味道；炸番薯配上梅子粉，味道酸酸甜甜，食多件都唔會溜。
麻辣豬爽耳
豬耳切成一條條，仍然保持爽口度，麻辣味重，十分醒胃。
肉燥小茄子
小茄子細細條，一口一條，仲煮到非常入味，加埋肉燥，口感豐富。
