【Now.com】各位，仲記唔記得有一間叫HTC嘅公司，無錯，佢仍然健在。今日仲發表旗下首款智能眼鏡 VIVE Eagle，主打時尚、輕薄外型。
多個品牌近年積極發展智能眼鏡產品，筆者要強調係智能眼鏡，外型好似一般眼鏡咁，唔係Apple Vision Pro嗰種大大個頭戴式裝置。其中比較出名有Meta 與眼鏡潮牌Ray-Ban、Oakley聯手推出嘅AI Glasses，另外有Even Realities G1，Google 之前亦預告以 Android XR 系統，出年搶攻智能眼鏡市場。
今次 HTC 所推出嘅 VIVE Eagle 眼鏡同 Ray-Ban Meta 相似，鏡框內藏鏡頭、咪、喇叭，用家透過聲控指令 AI 助理做嘢，唔使拎手機出嚟就可以全面應用眼鏡上智能功能。
用戶先講一句「Hey VIVE」召喚AI助理，再講你要佢做嘅嘢，例如「翻譯前面張菜單」，VIVE Eagle就會利用眼鏡上嘅鏡頭拍攝前面景物，智能判斷菜單內容進行即時翻譯。又或者拍攝影片，就會以第一身角度進行拍攝，整個過程唔需要拎部電話出嚟搞一大餐。另外，VIVE Eagle 兩邊眼鏡臂有一組開放式喇叭，廠方聲稱通過掩耳式設計避免漏音，唔使擔心影響到周圍嘅人。
HTC 預告，將為 VIVE Eagle 推出開放式系統，用戶可以自己選擇AI模型，啟用 ChatGPT 或者 Gemini，HTC亦開放同第三方 App 合作，引入更多唔同嘅服務。
HTC VIVE Eagle 預計 9 月 1 號正式上市，將推出黑、紅、灰、咖啡 4 種顏色，可以用作太陽眼鏡，亦可以配上有度數嘅鏡片，老花鏡片或平光鏡片都無問題，建議售價 15,600 新台幣，折合約4,100港元。
資料來源：HTC
