【A&M Diary】大紅袍火鍋料理喺邊爐界嘅地位一直都唔低，可以話喺天皇級嘅火鍋餐廳。嚟到位於荃灣分店嘅大紅袍火鍋料理，餐廳主打港式火鍋，由極具氣派嘅中式古典設計風格，加上用料豐富嘅湯底，配合新鮮高質嘅食材，收費雖然唔平，但食完又會覺得呢個價錢非常值得，推介想揾啲高質嘅非任食火鍋選擇。
頭盤先嚟個牡丹蝦刺身，一人一隻。賣相已經好吸引，蝦身有手掌咁大，最重要係多膏兼夠膠口，非常滿足。
食完頭盤，終於見到「金屋藏嬌」！其實「金屋」係指鍋中嘅黃色湯底，「嬌」就係松草花同隻雞喇！裏面仲有竹笙，冬瓜，支竹，真係好足料！
好嘢，蟶子駕到！萬歲萬歲萬萬歲！店長是日推介真係唔同啲，好新鮮，又爽又甜！
