【A&M Diary】如果話去沙田係食雞粥，元朗係食涼粉，咁去大埔就梗係食豬扒啦！東記上海麵屹立於熟食中心多年，成為熟食中心內極高人氣嘅餐廳，絕對係區內嘅街坊名店，餐廳出品嘅炸豬扒，非常酥脆，真係從來都唔會令你失望！原來喺廣福道都有分店，地點更方便。
淨炸豬扒
嚟到大埔東記上海麵，點可以唔食佢嘅炸豬扒，豬扒大大塊，夠晒誠意！炸得金黃香脆，唔會乾柴，肉質嫩滑有肉香，真係好滋味！
雞翼拼牛筋上海粗麵
東記上海麵嘅麵食單拼定雙拼都一樣價錢，而且份量十足，真係好抵食。炸雞翼炸到黃金香脆，脆卜卜，香口又惹味；牛筋炆得夠腍，入晒味，配埋彈牙嘅上海粗麵，真係一流！
墨魚條拼菜肉雲吞上海粗麵
炸墨魚條外脆內彈牙，咬落去有咬口又唔會韌；菜肉雲吞飽滿多汁，粗麵夠掛汁，真係好滿足！識食一定加埋腩汁，更滋味！
