【Now.com】海洋公園昨晚（10日）最新貼文透露，家姐右眼有異樣，從園方公開的影片所見，「家姐」右眼眼頭有一塊粉紅色傷口，疑似係兩姐弟玩得太興奮，被細佬錯手整傷，不過幸好眼球未有受傷，經過治療後已無大礙，園方正密切觀察其康復情況。
兩姐弟日常玩耍，少不免互相扭打撕咬，不過近日有「契爸、契媽」發現，「家姐」隻眼仔紅咗嘅？海洋公園的獸醫團隊為「家姐」進行了詳細的檢查，確認牠第三眼皮結膜受傷，幸好眼球無事，視力未受影響，而受傷部分癒合良好，目前已經無需再滴眼藥水。
園方引述獸醫稱，「家姐」的下眼皮瓣依然明顯，受傷的眼皮有機會持續存在，不過現時「家姐」沒有不適的行為，暫時不需要進一步的治療。動物團隊與獸醫團隊會繼續密切觀察「家姐」的康復情況，呼籲各位契爸契媽不用太擔心。
海洋公園帖文全文：
大家最近可能留意到家姐右眼有啲異樣
其實奶爸奶媽們都一直密切注意！
經過詳細檢查後
發現家姐眼皮受傷，疑似係兩姐弟玩得太興奮而造成~
不過好彩有專業嘅動物護理同獸醫團隊悉心照顧，
家姐已經無大礙啦~ 契爸契媽們唔使擔心！
一眾網友得知「家姐」受傷紛紛留言為牠打氣：「家姐快啲好返啊，期待黎睇你地架」、「家姐要乖乖滴眼藥水啊。祝早日康復！」、「家姐眼仔無事就好啦～細佬要錫住家姐玩嘅時候唔好咁重手啊」、「受傷的眼皮可能一直存在，即係有疤？家姐豬豬，以後要小心啲啊」、「細路仔玩，有些微碰撞在所難免。我媽媽話，我哋個個都係跌跌碰碰長大嘅」。
另有網民感謝護理員的付出：「想特別稱讚奶媽奶爸，見佢哋都好攰，世上只有爸媽好，奶爸奶媽唔容易做，好大壓力，多謝照顧家姐細佬團隊，加油」、「感謝奶爸奶媽，照顧得家姐細佬好好。」
