【A&M Diary】好多人話到糧尾日子就最鍾意食碗魚丸粉或者雲吞麵，但就算糧尾都要食碗有質素嘅雲吞麵！今日放工之後，我哋去到公司附近，位於北角嘅富怡粉麵專家。小店面積細細，但選擇甚多，而且衛生唔錯！
小食拼盤
拼盤可以五揀三，我哋揀咗泰醬炸雲吞、黃金炸墨魚丸同蒜香炸雞翼。雲吞炸到脆卜卜，入面嘅蝦肉大大粒；墨魚丸真係炸到金黃色，入面仲有墨魚粒，夠爽口彈牙；而蒜香炸雞翼略嫌細隻咗啲。下次要試埋另外嗰兩款先得：鮮炸鯪魚球、炸韭菜餃。
牛三寶河
三寶係指牛腩、牛肚同牛孖筋，好豐富！牛腩肥瘦度適中，所以夠軟腍，牛肉香味濃郁；而牛肚炆得入味，夠彈牙；至於牛孖筋嘅膠口，骨膠原滿瀉！
麻辣金菇肥牛河
A姐話想食啲辣嘢，所以就叫咗麻辣金菇肥牛河，河粉索晒辣湯，好好味喎。金菇同肥牛份量唔少，麻香十足。
地道潮州蠔仔粥
店主極力推介嘅粥，因為用上蝦湯餚製，配埋蠔仔，令湯底更加鮮甜。
