【A&M Diary】放假想瞓晏啲，但屋企長輩又想去飲茶？好彩依家多咗好多點心茶餐廳，真係由朝食到晚黑都得。嚟到太子嘅新贊記點心皇，點心全部即叫即蒸，食物出品唔錯，價錢又抵，又唔使加一，就連長輩都話正！
贊記蝦餃皇
晶瑩嘅蝦餃皮包住大大隻嘅鮮蝦，份量十足，爽口彈牙。
鴛鴦燒賣
新贊記點心皇嘅燒賣，有牛肉燒賣同鮮蝦燒賣，叫鴛鴦燒賣就兩款都可以食晒。鮮蝦燒賣除咗新鮮彈牙，餡料仲加上冬菇，令味道多咗一份層次。
醬皇蒸鳳爪
鳳爪吸收晒豉汁嘅香味，夠晒入味，又夠軟腍。
牛肉球
牛肉、馬蹄、芫荽、陳皮等製作而成，再加上喼汁調味，口感彈牙，味道充滿層次，但最正當然吸收晒牛肉香嘅腐皮。
珍珠糯米雞
糯米飯滲透住淡淡嘅荷香味，入邊包住鹹蛋黃同豬肉，夠晒飽肚。
香煎蘿蔔糕
蘿蔔糕煎得乾身又夠香脆，啖啖都有蘿蔔絲、臘腸、蝦米，非常滿足。
