【A&M Diary】去茶餐廳叫餸食飯，係唔少香港人comfort dinner嘅選擇。有魚、有肉、有菜又有湯，加埋杯餐茶，絕對係一餐豐富嘅港式盛宴！但背後嘅故事，其實係我有一個無飯主婦，哈哈。不過，灣仔凱旋餐室嘅菜式選擇多，真係食極都唔會厭，今晚一於唔好煮飯啦！
清蒸石斑
平時喺茶餐廳又點會食石斑？但灣仔凱旋餐室嘅石斑非常新鮮，石斑嘅肉質嫩滑，掌握好時間，最後加上蔥花滾油同埋豉油嘅點綴，簡簡單單就有種家嘅味道。
家鄉蔥油雞
蔥油以外用咗大量蒜頭爆香，滿滿地舖滿喺雞上面，蔥油味芳香撲鼻，而且仲可以用嚟撈飯。而雞件肥瘦均勻，件件都有少量油脂連住雞肉，油脂融合雞肉食落雞味更加濃烈。
乳鴿
乳鴿係灣仔凱旋餐室嘅招牌，乳鴿皮香肉嫩，啖啖都有肉汁湧出，回味無窮。
