【MOBILE】英國法恩堡國際航空展（Farnborough International Airshow）係全球三大航展之一，每兩年喺英國嘅法恩堡（Farnborough）舉行。法恩堡國際航空展將會展示最新設計嘅軍機、民航客機、機艙配備，甚至航天技術嘅未來方向等，成為航空公司、國家空軍，甚至航空迷、軍事迷嘅焦點。今年，我哋就好榮幸收到英國法恩堡國際航空展嘅邀請，親臨呢個航空業界嘅盛事。
法恩堡國際航空展 | 六大主題
英國法恩堡國際航空展2024分為5個室內展區，內容圍繞六大主題：Space（太空）、Defence（防禦）、Sustainability（可持續發展）、Innovation（創新）、Future Flight（未來航空）、Workforce（勞動力），展覽期間有唔少航空業內嘅專業論壇同研討會，探討航空業嘅最新技術和發展趨勢。
對於作為一般訪客嚟講，當然對於Future Flight最有興趣啦！記得早幾年世界各地嘅航空展，主角當然係空中巨無霸：A380，機上空間十足，豪華舒適嘅客艙，機上甚至配備浴室等設施；但隨著航空公司嘅營運方向轉變，今年嘅主角之一就係A321XLR，賣點係以窄體機（單走道客機）營運跨洲航線，令航空公司有更大靈活性處理客量較少嘅長途航點，不過，對於乘客嚟講，舒適度相對嚟講就可能差少少喇！
另外，作為世界頂尖嘅國際航空展之一，參展單位除咗波音同空中巴士之外，仲有中國商用飛機、韓國航空宇宙產業、本田飛機公司等亞洲嘅代表。而喺展覽期間，新聞報道亦會不時更新航空公司訂單，例如：日本航空購31架空中巴士飛機、大韓航空下訂40架波音飛機……
法恩堡國際航空展 | 飛行示範
踏入法恩堡國際航空展場地，睇到嘅第一個參展商，就係卡塔爾航空。作為全球最佳航空公司，卡塔爾航空嘅服務不容置疑，佢哋仲準備咗最新嘅頭等客艙俾大家即場體驗呢！
但講到每一個航空展嘅焦點，當然就係飛行示範啦！嚟到法恩堡國際航空展，就要留意大會嘅時間表。大家可以喺跑道外，以最近嘅距離觀賞飛行示範。除咗最新型號嘅民航客機，仲有軍機、懷舊飛機，甚至跳降傘等表演。講到最唔可以錯過嘅就一定係軍機嘅飛行示範，機師會展示軍機嘅速度同靈活性，180度衝上又衝落，仲會不斷360度自轉，真係睇到非常驚險。
