【A&M Diary】又麻又辣嘅川菜令人又愛又恨，愛佢嘅麻辣味道層次，但又恨佢嘅刺激麻痹感覺。不過，好味嘅川菜，真係我愛你呀！位於北角嘅688，餐廳由獲獎川菜名廚主理，將主打正宗家常小菜帶到香港，川菜又點止麻辣火鍋呢！
蟲草花雞腳排骨湯
真材實料嘅老火靚湯，味道鮮甜。濃濃嘅骨膠原，非常滋補。
天府川皇水煮魚
水煮魚絕對係川菜嘅代表之一。紅卜卜嘅紅油配上無數嘅辣椒同花椒，所以一上枱就飄嚟陣陣嘅麻香味道，望落雖然好似好辣咁，但係其實味道係麻而不苦，油而不膩，層次非常豐富。無骨嘅魚肉非常滑嫩，加上入晒味嘅爽脆蓮藕片、大豆芽、涼粉等配菜，非常滿足。
陳年花雕醉雞
淡淡嘅花雕酒香味嘅陳手花雕醉雞，充滿層次，雞肉嫩滑，愛不釋手。
金獎涼白肉
得獎嘅小菜，當然係必食啦！豬肉肥瘦分明，油香肉嫩，加上香辣嘅醬汁，滋味又開胃！
