【A&M Diary】喺香港，一餐完美嘅晚餐，又點少得甜品呢！特別係成班朋友雖然食飽飽，但又意猶未盡，甜品自然係最佳嘅選擇。位於太子嘅甜聚雪花冰甜品屋，除咗傳統嘅甜品，亦有新潮嘅選擇，好味之餘又可以打卡，第二個胃即刻啟動。
芝麻糊加配湯圓
芝麻糊好滑，完全無起沙嘅感覺。天氣熱，所以叫咗凍芝麻糊，雖然無咗熱辣辣香噴噴嘅感覺，但口感味道仍然香濃綿滑。芝麻糊另外加咗湯圓，湯圓餡料都係芝麻味，啱啱煮好嘅湯圓煙韌燙熱，加喺凍冰冰嘅芝麻糊入邊有冰火雙重嘅感覺。
芒果椰汁西米露
芒果椰汁西米露係甜品舖最穩陣嘅選擇！打成蓉嘅芒果，非常香甜，加上椰香十足嘅西米露，非常清新。
