【A&M Diary】膝頭哥就梗係唔食辣椒醬啦，但我嘅味蕾就好鍾意喇！位於灣仔嘅辣椒醬，餐廳由泰國人主理，而辣椒醬嘅店面雖然無乜泰式擺設，但其實係走泰國嘅地道大排檔風格（好彩辣椒醬係有冷氣）！加上主打嘅泰國菜食物，流露住泰式暹羅風。
冬蔭公湯
泰國菜嘅調味係隨著地區而略有不同，呢份冬陰功湯嘅調味偏甜，屬於泰國中部地區嘅recipe。呢個做法除咗令本身酸辣嘅冬陰功湯，加添一份層次之外，亦更容易入口，連小朋友都飲得。而且冬蔭公湯嘅大蝦份量相當多，口感彈牙，非常抵飲。
生菜包
生菜包嘅靈魂，當然就係肉碎啦！香辣惹味嘅炒肉碎遇上清新爽脆嘅生菜，係一道口感豐富嘅開胃菜。
蒜蓉炒通菜
泰國嘅蔬菜，第一時間一定係諗起通菜。呢碟蒜蓉炒通菜雖然唔係一碟複雜嘅菜式，但越簡單其實越考功架。鮮嫩嘅通菜炒得乾爽有鑊氣，配上濃郁嘅蒜蓉香味。
泰式牛肉船河
喺泰國食船河，分分鐘要食10碗，但喺辣椒醬，份量十足，一碗就夠。船河湯底味道濃郁，除咗用上豬血同黑醬油嚟調味之外，仲落咗花生醬令到湯嘅味道更香濃，配合埋肉質嫩滑嘅牛肉，真係隔籬枱見到都忍唔住叫返碗。
