【A&M Diary】屋企姐姐煮嘅廣東菜唔啱你口味，其實好正常，正等如叫你整印尼菜都絕對唔啱當地人口味。不過，你其實又有無試過真正地道嘅印尼菜呢？位於旺角嘅Restoran Indonesia Kampung Kita，充滿印尼家鄉風味，深得姐姐們嘅推介，雖然佢都係姐姐嘅同鄉，但佢係印尼人嘅香港人氣飯堂。
蒜蓉芽菜
芽菜白嫩飽滿，簡單用蒜蓉將芽菜炒香，芽菜帶有淡淡嘅蒜蓉香，入口仲係非常爽脆！
峇里火焰燒雞半隻
雞皮燒到焦糖色，賣相已經好吸引！雞皮脆卜卜，而雞肉保持嫩滑。點上印尼地道特色嘅燒汁，鹹中帶辣，令燒雞嘅味道更具層次。
巴東牛肉
食印尼菜又點少得巴東牛肉呢！貌似咖喱，但因為加咗椰漿，所以味道微甜，送飯一流！
沙嗲雞肉三串
東南亞各國都興食串燒，印尼菜都唔另外。串燒嘅雞肉嫩滑，但食串燒嘅重點當然係沙嗲醬啦！濃郁嘅沙嗲醬，帶有微微嘅花生香味，非常惹味。
珍多冰
天氣開始熱，嗌杯凍嘢飲就少不免啦！嚟到印尼餐廳當然要嗌招牌珍多冰，甜甜嘅椰汁加上綠豆粉同班蘭造成嘅粉條，香甜軟滑，非常解渴！
