【A&M Diary】天氣又濕又熱，真係0胃口，本身諗住食少啲，順便當減肥，但嚟到太子嘅金泰子泰國餐廳，由一碗冬陰公開始，我就跌落開胃嘅漩渦，酸酸辣辣嘅泰國菜真係令人食欲大增，最後叫埋咖喱軟殼蟹，真係夠晒滿足。
冬陰公海鮮湯
好細心用咗小蠟燭讓冬陰公海鮮湯一直keep住溫度，食到尾都仲有溫熱嘅湯。冬陰公海鮮湯嘅酸辣比例啱啱好，充滿層次。至於海鮮有蝦同青口，除咗增加冬陰功嘅鮮甜味，啲海鮮亦已預先拆晒殼，所以食嘅時候更方便。
酸辣鳳爪
酸酸辣辣令人非常開胃，所以除咗冬陰功之外，叫多個店員推薦嘅酸辣鳳爪啦！酸辣鳳爪嘅醬汁係金泰子泰國餐廳自家調製，鳳爪索晒醬汁，爽口彈牙，味道先酸後辣，非常惹味。
馬拉盞炒通菜
食泰國菜嘅綠色選項又點少得馬拉盞炒通菜呢？金泰子泰國餐廳選用嘅通菜源產係泰國，通菜夠晒爽脆，而馬拉盞當然係呢個餸嘅靈魂，鹹香提升。
招牌咖喱軟殼蟹
招牌咖喱軟殼蟹係金泰子泰國餐廳嘅招牌菜，咖喱汁微辣，但醬汁帶有蛋同蟹膏，所以醬汁非常香濃，而略帶鮮甜味。軟殼蟹即叫即炸，所以外皮非常香脆，而肉質仍保持嫩滑。絕配當然唔少得蒜蓉包，加上大量嘅咖喱醬，邪惡得嚟又令人食唔停口。
