【A&M Diary】熱辣辣嘅天氣真係令人無晒胃口，不如食啲酸辣嘢刺激一吓味蕾啦！位於熱帶嘅泰國，菜式口味就係因應當地炎熱嘅天氣調味，酸酸辣辣，非常惹味。而喺觀塘嘅泰國菜選擇就揀咗精緻嘅打卡餐廳：Thai Fire。
青木瓜沙律
講消暑又點少得青木瓜沙律呢款常見嘅泰式開胃菜，刨絲嘅青木瓜爽脆而鮮甜配上開胃醬汁，加上新鮮嘅生菜同蕃茄仔令口感變得相當豐富。
冬陰鮮菌烤魚
食泰國菜梗係會叫冬蔭功湯同烤魚，但叫曬兩個又驚食唔曬，所以呢個冬陰鮮菌烤魚就滿足曬兩個願望喇。冬蔭功湯嘅酸甜同辣味令到胃口大增，烤魚嘅外皮稍稍炸過，皮脆肉嫩，吸收咗冬蔭功湯汁嘅酸甜之後，令鮮甜嫩滑嘅魚肉更添風味。
蝦油海鮮炒飯
要炒飯炒到粒粒分明，又唔太乾，都係技巧之一。用蝦殼炸出嚟嘅蝦油，令呢個常見嘅海鮮炒飯變得不平凡。海鮮配菜包含蜆、青口、魷魚，蝦所組成嘅，配合炒蛋底嘅蝦油炒飯，香味充滿層次呀。
泰綠鮮奶
綠色嘅班蘭雖然味道唔係好突出，但佢伴隨住清幽嘅花香味同淡淡嘅甜味，除左冇影響鮮奶嘅味道，仲啱晒大家消暑。
