【A&M Diary】九州福岡有唔少屋台，一碗熱辣辣嘅街頭拉麵，真係諗超都流口水呀！但你有無諗過，原來喺倫敦市中心都有屋台呢？不過，呢間屋台唔係賣豬骨拉麵，係主打東南亞風味嘅越南Pho同新加坡喇沙嘅Phat Phuc Noodle Bar。
Beef Pho
Phat Phuc Noodle Bar位於巷仔入面，賣點嘅屋台Noodle Bar只設有4個座位，而另一邊則設有室內用餐位置，餐廳嘅整體座位數唔多，加上係倫敦其中一間人氣餐廳，所以要有排隊嘅心理準備呀！我哋就咁啱坐正喺屋台位置，濃郁嘅牛肉湯底同喇沙湯底，就喺正我哋面前，一於每樣叫一碗啦！Pho可以揀唔同配料，而我哋當然就係揀生熟牛肉啦！熱辣辣嘅越南牛肉河粉，芽菜、薄荷葉同芫荽已預先放上碗內，增加湯底嘅味道層次，如果唔要嘅，記得落單時講清講楚呀。河粉非常滑溜，生熟牛肉份量十足，但重口味嘅我哋就略嫌湯底香而不濃。
Prawn Laksa
估唔到越南餐廳嘅驚喜，在於呢碗喇沙！喇沙可以揀唔同配料，而我哋就揀咗蝦。蝦嘅份量足足有5大隻，隻隻都夠晒彈牙，但重點在於佢嘅湯底，蝦香味濃郁，配上椰香嘅襯托，極具層次，真係成碗湯清晒，值得推介呢。
