【A&M Diary】去酒店食自助餐，離不開兩種主題：有一種叫矜貴，好似任食龍蝦、生蠔；而另一種就叫罕有！旅居倫敦不時都會掛住港式美食，但喺英國嘅港式餐廳選擇唔多，而且價錢都唔平呢。今次我哋嚟到倫敦泛太平洋酒店嘅Straits Kitchen，自助餐竟然主打罕有嘅港式燒臘同獅城美食，可以盡情任食叉燒燒肉等美食，加上以英國嚟講，價錢一啲都唔貴，絕對抵食！
海南雞
總部設於新加坡嘅泛太平洋酒店集團，喺倫敦Liverpool Street都有插旗。而倫敦泛太平洋酒店旗下嘅餐廳Straits Kitchen，當然主打新加坡美食啦，而weekend嘅自助餐，仲可以任食佢哋嘅名物：海南雞。海南雞嘅雞肉非常嫩滑，雞皮一啲都唔肥，非常香滑，而重點係全部起晒骨，啖啖肉食得夠晒方便。食海南雞又點少得雞湯同油飯呢？雞湯同油飯同樣出色，但切忌食飯食得太飽呀！
港式燒臘
Straits Kitchen提供三款港式燒臘選擇，包括叉燒、燒肉同燒鴨。叉燒肥瘦分明，肉質軟腍，加上惹味嘅醬汁，非常滋味；燒鴨同樣預先起骨，食嘅時候啖啖肉，加上燒鴨皮非常香脆，值得一再encore！至於今日嘅燒肉皮燒得唔夠脆，所以就有少少失望。
新加坡喇沙
講到新加坡嘅美食，又點少得喇沙呢！Straits Kitchen嘅喇沙配料有蝦、豆卜、魚片、芽菜、雞蛋等，鍾意食邊款配料就夾多啲，最後加上米粉同喇沙湯，一碗新加坡喇沙完成！呢碗新加坡喇沙超好味，椰香十足，加上沙嗲香味，確實非常惹味！
斑蘭炸饅頭
饅頭炸到非常香口，外脆內軟，加上斑蘭嘅香味，唔洗點煉奶都非常好味，我哋每人足足食咗個4隻呀！
甜品
為咗配合返南洋主題，餐廳嘅甜品同樣充滿特色，好似有加入咗荔枝同士多啤梨嘅小蛋糕！而除咗甜品之外，餐廳嘅水果有西瓜、蜜瓜、哈密瓜，同英國非常少見嘅楊桃，真係非常滿足！
