【A&M Diary】香港嘅小韓國喺金巴利道、小印度喺重慶大廈，咁你知唔知小日本喺邊度呢？答案就係太古城喇！因為有唔少居港嘅日本人住喺大古城，所以喺太古站附近，就有兩間大型日本百貨公司，仲有選擇清一色為日本菜嘅Foodcourt呢！雖然選擇多，但拉麵控嘅M佬目標明確，直接就去咗Tonkotsu 8 by三田製麵所喇！
經典濃豚骨湯拉麵
湯底夠熱，加分！味道濃厚，再加分！拉麵掛湯，又加分！呢碗經典濃豚骨湯拉麵真係非常驚喜，配料方面仲有半隻流心蛋同三塊叉燒，呢個價錢嚟講，絕對抵食！
鐵板牛肉炒飯配麵豉湯
鐵板熱辣辣，所以食到底會有焦香飯焦，脆卜卜，非常香口。但因為鐵板太熱，牛肉同蛋會好易老，建議大家一上枱就盡快撈勻喇！
信州蘋果果汁梳打
最後叫咗支日本直送嘅信州蘋果果汁梳打，好清甜，好好味。
