【A&M Diary】對於葵涌嘅初感覺都離不開繁忙嘅工廠大廈，但原來喺呢個車水馬龍嘅地區，竟然有一間慢活而且文青感覺十足嘅Season. Café，成為葵涌嘅平行時空。另外，Season. Café嘅食物出品亦非常高質，充滿驚喜。
慢煮香煎牛舌串燒
牛舌以慢煮製作，並舖上大量蔥油作配搭，口感軟腍並十分彈牙，肉味香濃，非常驚喜。
Season招牌雙蟹肉特制蟹餅
蟹餅煎得乾身，但卻内有乾坤。軟綿綿嘅口感，絲絲嘅蟹肉，味道鮮甜又充滿幸福感。伴碟嘅特製醬料望落似黃芥末，更突顯蟹餅嘅蟹肉味。
大蝦帶子龍蝦汁意粉
用料新鮮係勝利嘅方程式，兩隻大蝦相當彈牙，帶子結實爽口，表面略煎變成黃金色，令人垂涎欲滴。濃酥嘅龍蝦汁香味撲鼻，意粉除咗軟硬度恰到好處，仲完全吸收咗龍蝦汁嘅鮮甜，色香味齊備。
牛仔很芒
對芒果口味情有獨鍾，奶味香滑加上芒果嘅微酸，解暑又解渴。
