【A&M Diary】近排天氣又悶又熱，搞到無乜胃口。好想食啲濃郁嘅味道，刺激一吓味蕾，所以我決定要搵阿豬媽幫我開開胃喇！嚟到位於寶勒巷嘅夜首爾，餐廳由韓國人主理，環境充滿地道韓風，味道亦非常正宗，胃口即刻大開啦！
泡菜
食韓國菜又點可以無泡菜呢？一坐低之後，店員就送上8小碟泡菜，碟碟都係店家每日新鮮手工現製。大白菜泡菜酸辣比例啱啱好，入晒味之餘，仲食到大白菜嘅爽脆口感。
雪濃湯
雪濃湯係傳統又地道嘅韓國菜，湯底呈雪白色，味道清甜而唔油膩，牛骨香味非常濃郁。配料有肉味濃厚嘅韓牛，而且份量十足，仲有索晒湯底精華嘅麵條，味道一流！雪濃湯另外配有白飯同醃蘿蔔，夠晒抵食。
辣雜錦海鮮窩
嘩！呢個辣雜錦海鮮窩上枱一刻，我哋真係「嘩」咗一聲。海鮮窩上有蟹、魷魚、蝦、八爪魚、青口、帶子等，淨係見到呢個配搭，已知道湯底夠晒鮮甜啦！店員貼心咁幫我地將蟹同魷魚拆件，除左方便煮熟、亦方便我地食用。特別鍾意非常鮮甜嘅蟹肉，至於魷魚、蝦、八爪魚同帶子都夠晒新鮮彈牙！而且呢個辣雜錦海鮮窩嘅辣度唔會太強，絕對唔會蓋過海鮮嘅鮮甜味。其他配菜仲有豆腐同高麗菜，佢哋亦做好自己本份，完美吸收曬各種海鮮嘅鮮甜精華呢！
