【A&M Diary】雖然近年香港有唔少嘅歷史被消失，但保留落來嘅古蹟，你又有去認識嗎？我哋無意中經過九龍城嘅時候，就發現呢個已被活化嘅石屋家園。其實喺香港，能夠成功活化嘅項目唔多，好多古蹟一係過度商業化，一係就宣傳不足，而石屋家園相信就係後者。如果大家路過九龍城嘅時候，不妨花少少時間參觀一吓石屋家園，影相打卡同時，認識二戰後嘅香港家園。
石屋家園
九龍城曾經係香港嘅市中心，所以人口密集，但受前啓德機場所限，建築物唔高。而石屋家園就係一幢由5個單位組成嘅村屋，以花崗岩同石屎建成，配以金字形由板瓦、筒瓦屋頂、木梯同鐵窗框等建築特色。至於石屋家園嘅歷史可以回到1940年代初之香港日治時期，由於當時日軍拆卸多條九龍城鄉村以擴建啓德機場，故此喺原址嘅何家園興建兩層高嘅中式石屋，直至戰後大量難民湧入香港，令呢度成為寮屋區，至2001年清拆。
32號單位
喺2001年清拆嘅時候，只保留了石屋，並成為現時唯一嘅建築物。而活化後喺32號單位建成文物探知中心，將原有嘅廚房保留，大家可以了解當時嘅廚房以石灶、煙囪同石磨等家家戶戶必備嘅煮食工具；至於旱廁更加係現時非常罕見嘅遺物。大家仲可以透過木梯前往2樓，透過唔同展覽了解石屋及九龍城嘅歷史同發展。另外，想睇真實嘅原貌，二樓亦展示咗昔日嘅家居環境，好似碌架床、樟木籠、狀元箱、鐵痰罐、洗面盆、紅白藍袋等，充滿時代嘅痕跡。
石屋咖啡冰室
喺文物探知中心嘅隔離就係石屋咖啡冰室，大家可以喺歷史嘅回憶中享受咖啡和小食。但呢個石屋咖啡冰室嘅原址原來係產房，由助產士接生，以減低醫院嘅負擔。
