【A&M Diary】中環有唔少特色餐廳，呢間充滿玩味感嘅超人的居酒屋就啱晒有要求嘅你喇！Musubi Hiro係一間以超人為主題嘅居酒屋，門口大大幅嘅壁畫已經非常吸引，至於食物再將日本同夏威夷嘅風格融合，擺盤非常精緻，真係由外到內都係打卡位，除咗食物味道嘅本身，仲可以食埋呢度嘅環境。
Scallop No Poke
微微燒焦嘅帶子夾住辣肉腸，估唔到兩者咁夾！帶子爽口鮮甜，加上鹹香十足嘅辣肉腸，將互相嘅味道提升，突出各自嘅優點，加埋上面鮮味十足嘅飛魚子，將鮮甜味道帶上另一個層次，口感豐富。
Uni Musubi
嘩，海膽分量超多呀！分開嚟食嘅話，海膽同魚子醬都有各自嘅鮮甜，海膽新鮮有光澤，鮮甜柔滑，入口一啲苦澀味都無。如果夾埋一齊食嘅話，軟綿嘅海膽配上爽脆嘅魚子醬，口感大大提升。
Classic Musubi
去過關島同夏威夷旅行，應該都會食個午餐肉壽司。嚟到Musubi Hiro就當然唔係咁簡單，厚切嘅午餐肉，預先經過特色嘅醬汁調味，加上小小嘅日式瓣數，配搭上爽脆嘅紫菜，豐富嘅味道同有層次嘅口感都有。
Wagyu Tongue Sukiyaki
燒得啱啱好嘅牛舌粒，肉汁被鎖住，肉味香濃，而且非常Juice，肉質軟腍，一啲都唔韌，真係超正！至於醬汁以日本醬油、芥末同蛋黃醬等混合，味道好有層次。
Poke Tuna Tacos
吞拿肉粒大大粒，完全無筋，油脂感豐富，配上清新嘅牛油果粒，真係好match！
