【A&M Diary】嚟咗英國三個月，最掛住一定係香港嘅味道。茶餐廳嘅鑊氣小炒、炒粉麵飯、西多士、奶茶、檸茶、紅豆冰……真係諗起都流晒口水！喺倫敦唐人街其實都有唔少港式餐廳，但係嗰陣熟悉嘅人情味，只可以喺倫敦嘅和味道茶餐廳（Wamimichi Noodle Bar）搵得到！和味道茶餐廳位於Hendon Central地鐵站旁邊，落車過條馬路就到，夠晒方便。
蝦餃、馬拉糕
望住和味道茶餐廳個餐牌，呢度食物選擇好多，但最估唔到和味道茶餐廳都可以滿足大家食點心嘅願望呀！本身我哋都疑惑喺茶餐廳食點心，傻的嗎？但真心好好味呀！蝦餃個皮勁薄，入面勁多蝦，新鮮彈牙，完全係驚喜之作；至於馬拉糕口感鬆軟，充滿蛋香。邊會諗到喺茶餐廳嘅點心都咁好味先得㗎！
星洲炒米
星洲炒米即叫即炒，所以上枱嘅時候出晒煙，熱辣辣，聞落帶有熟悉嘅星米咖喱味，相機食完，我就忍唔住要試吓喇！米粉幼細，每條米粉都掛上咖喱汁，炒得乾身，好好味呀！而且和味道茶餐廳嘅星洲米粉份量唔少，非常滿足。至於配料就有蝦、叉燒、雞蛋同洋蔥，鹹香十足，但如果配料再多啲就更加完美喇！
乾炒牛河
以前喺香港，我哋極少食乾炒牛河，因為真係好油，但和味道茶餐廳真係值得一讚，碟底完全唔會油淋淋㗎！乾炒牛河同樣即叫即炒，充滿鑊氣，河粉上色均勻，尚算滑溜。至於配料當然就係牛肉啦，牛肉軟腍，肉味香濃，再加上芽菜同葱段嘅香味，唔錯！
