12月19日搭港鐵、巴士同電車都免費，咁難得可以全日任搭免費車，當然要出街行下啦，咁啱香港拯救貓狗協會（HKSCDA）就喺當日舉辦狗狗領養日，歡迎大家嚟同狗狗見面。
HKSCDA 今個星期日（19日）將會喺荃景青年空間舉辦領養日，到時會帶十隻狗狗同大家見面，當有部分係因為主人移民而棄養。就算你未準備好養寵物，都一樣可以去探下狗狗，同佢哋玩下相處一下，等佢哋重新感受被愛嘅溫暖。
如果無時間去領養日嘅朋友，都可以留意 HKSCDA 網店，佢哋所得嘅利潤會全數用於拯救貓狗，由即日起至19日，買滿$800或以上仲會隨機送出日本（冷凍製法魚肉乾粒）貓狗小食。
以下就同大家介紹領養日十位主角：
1. 台仔｜6歲｜男｜適合新手家庭
曾被狗隻咬傷耳仔，傷口潰爛更滿佈烏蠅蟲，但堅強樂觀嘅佢經治療後已完全康復，而且仲超級親人，成日都「四萬咁口」擺出招牌側頭動作！
2. Aero｜1歲｜女｜適合新手家庭
今年八月喺高速公路旁邊被發現，識守規矩又禮讓，好快就融入狗群，仲好嗲人會主動親近你！
3. 莊子｜3歲｜女｜適合新手家庭
本來屈居喺拳館樓梯底，要間中有學生帶佢出街，先有機會接觸外界⋯⋯拳館結業之後更慘被拋棄，不過佢仍然渴望被愛，好需要人嘅陪伴，令佢感到安心自在！
4. Lily｜1歲｜女｜純種瑪蓮萊｜有飼養經驗者優先
雖然佢身型高佻優美，而且雙眼炯炯有神，但卻慘被兩度遺棄，先係被要移民嘅主人掉低，之後更因為太親人唔識看門口而再度被棄。Lily 活潑好動、精力充沛、忠心耿耿，絕對唔應該被當為看門狗，值得一個好嘅主人寵愛。
5. Lulu｜4歲｜女｜適合新手家庭
又一隻因為移民被棄嘅狗狗，初到協會嗰陣更因為想返去主人身邊，不停用鼻嘗試頂開閘門，搞到個鼻損晒⋯⋯其實佢相當叻女，一般嘅 Sit、Hand 指令難佢唔到，仲會主動挨近你！
6. 松子｜2歲｜女｜有養狗經驗家庭優先
三個月時被領養，可惜兩年後被遺棄，之後仲鬱鬱不歡，無晒食慾，無晒動力，好似清楚知道自己已被嫌棄咁。而家佢對住相熟嘅義工會主動討玩，仲好鍾意玩玩具添！
7. Chopper｜3歲｜女｜適合新手家庭
初被發現時耳仔受感染，生滿蛆蟲，好在有義工救助及時醫治，而家已經好返晒喇！Chopper 性格比較文靜，又夠醒目，從來唔會發嬲或者亂吠。
8. 珍寶豬｜2歲｜女｜馬史提夫混唐狗｜有養狗經驗家庭優先
活潑好動，精力充沛，天性善良，聰敏受教。
9. Leia｜1歲｜女｜適合新手家庭
鍾意去街街探索世界嘅 Leia，遇到其他狗狗會主動去玩，對小朋友都好友善㗎！而且佢仲好愛乾淨，喺屋企去完便便會自己包起張尿墊，去完街仲試過自己入浴室等沖涼！
10. 家朗｜2歲｜男｜適合新手家庭
好罕見嘅細身唐唐！原本家朗一直陪住伯伯，可惜之後伯伯被送去老人院，就再無人照顧⋯⋯雖然佢細細粒，不過成日都自信滿滿，仲好為食，相信有主人悉心教導，一定會好快學識唔少指令！
「領養不棄養」
如果想養寵物，比起去寵物店買，領養絕對係更好嘅選擇。你可以同狗狗有更多嘅接觸，去狗舍或者領養日同佢哋相處，了解佢哋嘅性格、習慣同故事，再決定接佢哋返屋企，一齊締造更多珍貴嘅回憶，改寫佢哋一生。
