【A&M Diary】相信有唔少人認識鐵達尼號都由1997年的同名電影開始，男女主角嘅愛情故事確實令人刻骨銘心，加上大部份人物、情節，以至郵輪上嘅設施都盡量還原，成為當時一套經典嘅電影。鐵達尼號至今雖然已經沉沒超過一百年，但大眾對呢架船仍然充滿好奇，今日我哋就嚟到銅鑼灣嘅iLab科文館參加香港首個鐵達尼號專題展，小至一粒煤炭，大至椅子，都可以讓大家觸碰歷史，了解鐵達尼號嘅真實故事。
鐵達尼號
鐵達尼號（RMS Titanic）係英國白星航運公司旗下嘅三艘郵輪之一，全長269.1公尺，寬28.2公尺，排水量達52,310英噸，最高載客量為3,547人。設有10層甲板，其中8層供乘客使用，係當年全世界最大最豪華嘅郵輪，而且鐵達尼號嘅設計能夠承受4個隔艙入水，所以被譽為當時最安全嘅郵輪。喺1912年4月10日12點，鐵達尼號離開英國南安普敦港，中停法國嘅瑟堡同愛爾蘭嘅皇后鎮後，就載住2,224名船員及乘客跨越大西洋前往美國紐約，但喺航行嘅第5日，即1912年4月14日夜晚11點40分，不幸撞上冰山，加上船上逃生設施不足及人為失誤，令生還的人數只有30%左右，最終喺1912年4月15日凌晨2時20分鐵達尼號完全沉沒，超過1500人罹難。
鐵達尼號專題展覽
鐵達尼號沉沒已經超過一百年，但仍有多個未解之謎，所以不時都有探險隊同科學家到鐵達尼號沉沒嘅海底探勘殘骸。雖然每次嘅海底探勘所費不菲，不過就極具意義，所以每件打撈出嚟嘅物品都深受收藏家喜愛！今次我哋嚟到位於銅鑼灣iLab科文館舉辦嘅期間限定展覽，展覽以鐵達尼號為題，搜羅接近150件珍品文物，除咗有部份係嚟自鐵達尼號，亦有嚟自姊妹船嘅物品，讓大家重新認識鐵達尼號嘅真實故事。
鐵達尼號分為三個艙等，以碌架床為設計嘅三等艙每位收費約HK$3,000，但頭等艙則索價HK$800,000。所以唔同艙等嘅設施同設計都有所分別。例如頭等艙內設有工人房，讓家傭可以喺航程中照顧頭等艙嘅顧主；至於三等艙嘅乘客，佢哋大部份都係低下階層，主要希望前往美國開展新生活，所以對佢哋嚟講，房內設有私人洗手盤已經係極豪華嘅安排。至於船上亦設有健身房、室內暖水游泳池、網球場、圖書館、高檔餐廳、讓乘客與家人保持聯繫嘅無線電報服務等。
喺iLab科文館嘅鐵達尼號專題展覽更展出當年嘅真實報紙，讓我哋了解到，當時嘅生還者同罹難者嘅故事。原來當時逃生時，會按照艙等、女乘客、小朋友及長者優先，所以頭等艙僅有4名女乘客罹難；而三等艙則有超過80%嘅男乘客罹難。不過倖存嘅男乘客，都受到當時社會抨擊，佢哋部份更患上抑鬱症。
除此之外，鐵達尼號專題展覽仲展出鐵達尼號所用過嘅煤炭、地板、枱布等極具意義嘅收藏品。其中，我哋更加可以聞到當時鐵達尼號所用嘅香水同獲得船上頭等艙所用嘅Vinolia番梘。
