【A&M Diary】A姐自《大叔的愛》後，就「嫁」咗比Mirror，成為神徒，而我就變咗前任喇！作為教主嘅粉絲，佢今日話要去教主去過嘅地方朝聖喎，所以嚟到《不可愛教主》MV嘅拍攝場景：孫中山紀念館。位於中環嘅孫中山紀念館採用西方建築風格，勁多打卡位，仲可以了解被列為法定故蹟嘅甘棠第及孫中山先生的革命歷史。
前往方法
1. 利用中環至半山扶手電梯至堅道，再沿行人路向西步行約5分鐘到達孫中山紀念館
2. 巴士：12、12M、13、23、23B、40、40M、103於孫中山紀念館巴士站落車
甘棠第
建於1914年嘅甘棠第，其實係由富商何東嘅二弟何甘棠興建。甘棠第樓高4層，屬愛德華時代嘅古典建築風格，係香港其中一座最早以鋼筋構建，並有供電線路鋪設嘅私人住宅，以二十世紀嚟講，呢度絕對係一間超級奢華嘅豪宅。
耶穌基督後期聖徒教會
何甘棠離世後，呢間大宅賣咗俾鄭氏家族，再轉售予耶穌基督後期聖徒教會，成為教會嘅聚會場所。至1990年，被列為二級歷史建築，但教會卻喺2002年計劃拆卸改建，引起中西區區議會同市民反對，後嚟政府以$5,300萬收購，並動用$9,100萬進行修葺，活化成為孫中山紀念館。現時，孫中山紀念館仍保留住教會嘅洗禮地方，以見證呢段歷史。
孫中山紀念館
喺2006年終於活化成為孫中山紀念館，面積約2,560平方米，分為唔同嘅展覽廳，其中兩個常設展覽廳嘅主題分別為「孫中山與近代中國」及「孫中山時期的香港」。展出多件珍貴歷史文物，配合視聽節目，讓大家了解孫中山先生嘅生平事蹟。
主樓梯
主樓梯以柚木建成，保存良好。另外放有植物同鋪上紅色地毯，非常富麗堂皇。而且窗戶色彩斑斕，非常精緻，古典味十足。
專題展覽廳
至於作為神徒嘅A姐，花咗最多時間打卡嘅就梗係孫中山紀念館內嘅專題展覽廳啦！因為《不可愛教主》MV入面嘅場景，大部份都係嚟自呢個展廳，白色主調、金箔裝飾、吊燈、壁爐等等，保留住愛德華時代嘅古典建築風格，極盡華麗。
弧形露台
另一個《不可愛教主》MV嘅打卡位就係位於一、二樓嘅弧形露台。露台以希臘式巨柱承托，充滿巴洛克建築風格。
