【A&M Diary】位於炮台山嘅歷山酒店以維多利亞時期為設計風格，當我哋踏入酒店，就好似置身喺歐洲嘅宮殿，勁多打卡位呀！除咗打卡，我哋仲嚟到歷山酒店內嘅歷山餐廳嘆個半自助午餐添！更估唔到嘅係呢個半自助午餐嘅CP值超高，除咗自取區選擇豐富，更重要係主菜質素夠晒驚喜呀！
半自助餐區
歷山餐廳嘅自助區範圍好大，選擇超多：前菜、沙律、餐湯、海鮮、刺身同甜品等等，非常豐富，真係未食主菜都已經飽咗7成喇！
前菜
無論係半自助餐區定主菜menu都會不定期更新，以讓食客有新鮮感。其中前菜方面，除咗火腿之外，大廚亦特意安排四川小食，今期嘅四川風味就有川辣酸薑皮蛋，酸薑清香爽脆，皮蛋泛起溏心，軟綿滑溜，夠晒醒胃。
沙律
鍾意食沙律嘅人，呢個沙律吧確實唔可以錯過！沙律菜有成10款選擇，款款都夠晒新鮮爽脆；醬料有5款而配料亦有4款點綴。
餐湯
餐湯就有中西式兩款，西湯係creamy嘅南瓜湯，南瓜超鮮甜濃郁，打得綿滑無渣；至於中湯就係節瓜章魚煲豬骨，近排少湯水嘅我哋就啱晒，因為非常足料，感覺無落味精。
海鮮
喺半自助餐時段，餐廳提供凍蝦、螺同青口，樣樣都夠晒新鮮。我哋特別推介螺，因為真係非常鮮甜，肉身彈牙！另外，除咗海鮮凍盤，餐廳亦有提供任食嘅芝士焗生蠔，蠔肉鮮甜，肉質豐厚，芝士夠creamy，生熟程度啱啱好。
刺身
無論係自助餐定半自助餐，刺身都係唔少得。今日嘅選擇有三文魚、甜蝦、魷魚等。其中三文魚提供唔少腩位，油脂比例豐富，好好味呀！
炭燒美國西冷扒配紅酒汁
終於嚟到主菜喇！牛扒我哋揀咗5成熟，生熟度啱啱好，肉味濃郁，好juicy。至於薯塊亦炸得非常香脆，薯味濃郁。
蒜香鵝肝牛柳
主菜除咗西式選擇，仲有唔少中式小菜。我哋就叫咗蒜香鵝肝牛柳，鵝肝大大粒，入口即熔，鵝油豐富。至於牛柳軟腍，份量十足。仲有好多炸蒜片，夠晒香口，夾埋牛柳同鵝肝一齊食就更有口感。
甜品
提提大家記住留肚食甜品呀！呢度嘅半自助午餐供應5-6款甜品，其中芒果拿破崙蛋糕啲芒果爆多，夠晒鬆化，真係好好味呀！另外，仲有芝士蛋糕、水果同啫喱，非常豐富。
